لاہور کےعلاقے گلبرگ کے مقامی ہوٹل کی بیسمنٹ میں اچانک لگنے والی آگ پر بروقت کارروائی کرتے ہوئے قابو پا لیا گیا لیکن اس افسوسناک واقعہ میں 3 افراد جاں بحق ہو گئے جبکہ 6 زخمی ہوئے جنہیں ہسپتال میں علاج معالجے کی سہولیات فراہم کی جارہی ہیں۔ جاں بحق ہونے والے ایک شخص کی شناخت عمران کےنام سے ہوئی۔
ڈی جی ریسکیو ڈاکٹر رضوان نصیر کے مطابق آگ بیسمنٹ ون میں بوائلر پھٹنے کے باعث لگی، جس کے بعد فوری طور پر ریسکیو آپریشن شروع کیا گیا۔
ڈاکٹر رضوان نصیر نے میڈیا سے گفتگو کرتے ہوئے بتایا کہ ہوٹل کو مکمل طور پر کلئیر کر دیا گیا ہے اور تینوں بیسمنٹ میں سرچ آپریشن مکمل کر لیا گیا ہے۔ ریسکیو آپریشن میں 27 فائر گاڑیوں اور 72 اہلکاروں نے حصہ لیا۔
ڈی جی ریسکیو کے مطابق گیس اور دھواں بھر جانے کے باعث دو افراد جاں بحق ہو گئے جبکہ پانچ افراد اسپتال میں زیر علاج ہیں۔ انہوں نے بتایا کہ تمام بیسمنٹ میں پارکنگ میں کھڑی گاڑیاں اور موٹر سائیکلیں محفوظ رہیں۔
ریسکیو حکام کے مطابق صورتحال اب مکمل طور پر قابو میں ہے اور مزید تحقیقات کا عمل جاری ہے۔
ہوٹل انتظامیہ کاکہنا ہےکہ سی سی ٹی وی آپریٹر شہریارکا پتہ نہیں چل رہا، 200 کے قریب باقی عملہ محفوظ ہے،ہوٹل میں ٹھہرے ہوئے تمام لوگوں کو ریسکیو کیا جاچکا،چار کنال پر مشتمل پلازہ 19منزلہ ہے۔
