سیکیورٹی فورسز نے خیبر پختونخوا کے مغل کوٹ سیکٹر بنوں میں کامیاب انٹیلی جنس بیسڈ آپریشن میں فتنہ الخوارج کے دو دہشت گردوں کو جہنم واصل کر دیا گیا۔
سیکیورٹی ذرائع کے مطابق ہلاک ہونے والوں میں فتنہ الخوارج کا سرغنہ طارق کچھی اور اس کا ساتھی حکیم اللہ عرف ٹائیگر شامل ہیں۔ کارروائی کے دوران دہشت گردوں سے بھاری مقدار میں اسلحہ بھی برآمد ہوا۔
ذرائع کا کہنا ہے کہ کارروائی کے دوران فتنہ الخوارج کے طارق کچھی گروپ کی تشکیل کو مؤثر انداز میں نشانہ بنایا گیا۔ خارجی طارق کچھی کی تشکیل گزشتہ دو سال سے دہشت گردانہ سرگرمیوں میں ملوث تھی اور فتنہ الخوارج طالبان کے لیے بھتہ خوری کے معاملات میں بھی شریک تھی۔
سیکیورٹی ذرائع کے مطابق طارق کچھی افغانستان سے پاکستان میں دہشت گردوں کی دراندازی کے لیے سہولت کار کے طور پر بھی سرگرم تھا۔
