امیر قطر نے صدر مملکت آصف علی زرداری کی پاکستان کے دورے کی دعوت قبول کرلی۔ شیخ تمیم بن حمد الثانی آئندہ سال کے اوائل میں اسلام آباد آئیں گے۔
صدر مملکت آصف علی زرداری کی امیر قطر شیخ تمیم بن حمد الثانی سے دوحہ میں ملاقات ہوئی۔ دونوں رہنماؤں نے تاریخی اور برادرانہ تعلقات کو مزید مضبوط بنانے کے عزم کا اظہار کیا۔ صدر مملکت سے گفتگو میں امیر قطر نے کہا کہ قطر کو پاکستان اور اس کی کامیابیوں پر فخر ہے۔ شیخ تمیم بن حمد الثانی نے قطر میں پاکستانی کمیونٹی کے کردار کی تعریف کی۔ پاکستانیوں کی تعداد میں خاطر خواہ اضافہ کرنے کی خواہش کا بھی اظہار کیا۔
امیرقطر نے پاکستان سعودی عرب دفاعی معاہدے کو خوش آئند اور بروقت قرار دیا، کہا پاکستان منفرد حیثیت رکھتا ہے جو چین، مغرب اور خلیجی ممالک سے بیک وقت تعلقات رکھتا ہے۔ صدر مملکت نے امیر قطر کو حکومت پاکستان اور عوام کی جانب سے نیک تمناؤں کا پیغام پہنچایا قطر کی ترقی اور امیر قطر کی بصیرت افروز قیادت کو سراہا۔
صدر مملکت نے دفاع، دفاعی پیداوار، زراعت اور غذائی تحفظ میں تعاون بڑھانے کی تجویز دی۔ امیر قطر نے رضامندی کا اظہار کرتے ہوئے متعلقہ حکام کو فوری رابطوں کی ہدایت کر دی۔ صدر زرداری نے قطر میں دوحہ مذاکرات کی میزبانی اور افغانستان سے متعلق کردار کو بھی سراہا۔
امیر قطر نے کہا کہ پاکستان اور افغانستان موجودہ مسائل حل کرکے حالیہ چیلنجز کو پس پشت ڈال دیں گے۔ شیخ تمیم بن حمد الثانی نے پاکستان کے دورے کی دعوت قبول کرلی، وہ آئندہ سال کے اوائل میں اسلام آباد آئیں گے۔
