وزیراعظم شہباز شریف امیرِ قطر شیخ تمیم بن حمد الثانی کی دعوت پر دو روزہ سرکاری دورے پر دوحہ پہنچ گئے۔ امیر قطر کے ساتھ ملاقات میں دوطرفہ تعاون کے فروغ پر تبادلہ خیال کیا جائے گا۔
کنگ حمد انٹرنیشنل ایئرپورٹ پر قطر کے وزیرِ مملکت برائے خارجہ امور ڈاکٹر محمد بن عبدالعزیز الخلیفی اور پاکستانی سفیر محمد عامر نے وزیراعظم شہباز شریف کا استقبال کیا۔ نائب وزیراعظم و وزیر خارجہ اسحاق ڈار، وفاقی وزیر اطلاعات عطاء اللہ تارڑ اور معاونِ خصوصی طارق فاطمی بھی وفد میں شامل ہیں۔
وزیراعظم اپنے دورے کے دوران امیرِ قطر شیخ تمیم بن حمد الثانی سے ملاقات کریں گے۔ ملاقات میں اقتصادی تعاون، توانائی شراکت داری اور عوامی روابط کے فروغ پر تبادلہ خیال ہوگا۔ دونوں ممالک کے رہنما تجارت، سرمایہ کاری، بنیادی ڈھانچے کی ترقی اور افرادی قوت کی برآمد سمیت مختلف شعبوں میں تعاون کو مزید وسعت دینے پر بھی بات کریں گے۔ یہ دورہ پاکستان اور قطر کے گہرے برادرانہ تعلقات اور کثیر جہتی تعاون کے فروغ کے عزم کی عکاسی کرتا ہے۔
