مسلم لیگ (ن) کو آزاد کشمیر میں بڑی سیاسی کامیابی مل گئی۔ پی ٹی آئی کے سابق ممبر اسمبلی راجہ مجاہد نے مسلم لیگ (ن) میں شمولیت کا اعلان کردیا۔
راولپنڈی میں مسلم لیگ ن آزاد جموں و کشمیر میں سیاسی رہنماؤں کی شمولیت کی تقریب منعقد ہوئی۔ پی ٹی آئی کے سابق رہنما راجہ مجاہد ساتھیوں سمیت مسلم لیگ ن میں شامل ہوگئے۔
تقریب سے خطاب میں وفاقی وزیر امور گلگت بلتستان و کشمیر امیر مقام نے کہا کہ مسلم لیگ ن آزاد کشمیر میں شمولیتیں جاری ہیں، نواز شریف کی قیادت میں لوگ اکٹھے ہورہے ہیںا، لوگ جانتے ہیں کہ ہم مستقبل میں بھی کام کریں گے، لوگ دیکھ رہے ہیں کہ نوازشریف کشمیر کے وکیل ہیں۔
امیر مقام نے کہا کہ نواز شریف نے کہا کشمیر،گلگت بلتستان کو این ایف سی میں شامل ہونا چاہئے، جس منصوبے کا پوچھو یہی بتایا جاتا ہے کہ ن لیگ نے بنایا، جوائنٹ ایکشن کمیٹی کا بہت احترام کرتے ہیں، ہم نے مذاکرات کئے،کشمیر کی بہتری کیلئے بات کی۔
اس موقع پر لیگ رہنما حنیف عباسی نے کہا کہ ن لیگ میں شامل ہونے والے افراد کو خوش آمدید کہتا ہوں، آزاد کشمیر کے آئندہ الیکشن میں ن لیگ ہی کامیاب ہوگی، آزاد کشمیر کی سیاست میں جو بھی ہوسکا وہ کریں گے۔
واضح رہے کہ رواں سال جولائی میں آزادکشمیر اسمبلی کے انتخابات ہوں گے۔ سابق چیف جسٹس آزاد کشمیر ہائی کورٹ جسٹس (ر) غلام مصطفیٰ مغل کو چیف الیکشن کمشنر آزاد کشمیر تعینات کردیا گیا۔
