وفاقی وزیرمواصلات عبدالعلیم خان کا کہنا ہے کہ جلال پور پیروالا موٹر وے کو جلد از جلد بحال کریں گے۔ محکمہ آبپاشی پنجاب کا کام مکمل ہونے پر موٹروے کی فوری تعمیر شروع ہو گی۔ 15 سے 20 دن میں ایم فائیو بحال ہو جائے گی ۔ این ایچ اے حکام کو ٹاسک سونپ دیئے ہیں۔
عبدلعلیم خان کا مزید کہنا تھا ایم فائیو کی بحالی سمیت اہم فیصلوں کیلئے پنجاب حکومت سے رابطے میں ہیں ۔ موٹروے کی بحالی کیلئے مختلف ریجن سے افسران بلا رہے ہیں۔ این ایچ اے موٹروے کی مکمل بحالی تک مصروف عمل رہے گی۔ سیکرٹری مواصلات اور چئیرمین این ایچ اے مسلسل موقع پر موجود ہیں۔
وفاقی وزیرمواصلات نے کہا کہ سیلابی پانی سے موٹروے کے اسٹرکچر کو بھاری نقصان پہنچا ۔ جلال پور پیر والا شہر کو بچایا، شہریوں کی مشکلات کا علم ہے۔ محکمہ مواصلات متعلقہ محکموں سے مکمل رابطے میں ہے ۔۔۔ ایم فائیو کی بحالی کیلئے این ایچ اے دن رات کام کر رہی ہے۔
دوسری جانب وزیر آبپاشی پنجاب کاظم علی پیرزادہ کہتے ہیں موٹروے ایم فائیو پر تمام شگاف 4 اکتوبر کی شام تک بند کر دیئے جائیں گے ۔ سیلاب سے متاثرہ علاقوں میں پانی کی سطح بتدریج کم ہو رہی ہے۔ ماہرین کی ٹیم چھ اکتوبر کو صورتحال کا دوبارہ تکنیکی جائزہ لے گی۔ محکمہ آبپاشی اپنی تمام صلاحیتیں بروئے کار لا رہا ہے ۔ دریائے ستلج پر نور راجہ بند پر 7 میں سے تین شگاف کامیابی سے بند کر لئے گئے ہیں۔
