ڈسٹرکٹ اینڈ سیشن کورٹس اسلام آباد نے وزیر اعلیٰ خیبرپختونخوا علی امین گنڈا پور کے وکیل کے پیش ہونے پر ناقابل ضمانت وارنٹ گرفتاری منسوخ کر دئیے۔ علی امین گنڈا پور کے خلاف آڈیو لیک کیس میں نا قابل ضمانت وارنٹ گرفتاری جاری ہوئے تھے۔
ایڈیشنل ڈسٹرکٹ اینڈ سیشن جج نصر من اللہ نے کیس پر سماعت کی، علی امین گنڈا پور کے وکیل راجہ ظہور الحسن عدالت میں پیش ہوئے اور مؤقف اپنایا کہ سر آپ نے وارنٹ گرفتاری جاری کردیئے ہیں میں آج ہڑتال کیوجہ سے نہیں آیا۔ ٹی وی پر میڈیا والے ٹکرز چلارہے تھے۔
جج نصر من اللہ بلوچ نے ریمارکس دئیے کہ جب آپ عدالت میں پیش نہیں ہوں گے تو ٹی وی والے خبر تو چلائیں گے۔ ہڑتال تو وکلاء کی ہوتی ملزم نے پیش ہونا ہوتا ہے۔
وکیل صفائی نے دلائل دیتے ہوئے کہا کہ پشاور ہائیکورٹ نے 3 ہفتے کیلئے کسی بھی مقدمہ میں گرفتار کرنے سے روکا ہے۔ عدالت نے ریمارکس دئیے کہ آپ درخواست دیں میں دیکھ لیتا ہوں۔
علی امین گنڈا پور کے وکیل کیجانب سے وارنٹ منسوخی کی درخواست دائر کی گئی جسے عدالت نے منظور کر لیا عدالت نے علی امین گنڈا پور کے وارنٹ گرفتاری منسوخ کرتے ہوئے اگلی سماعت پر پیش ہونے کی ہدایت کر دی۔
عدالت نے آڈیو لیک کیس پر سماعت 5 نومبر تک ملتوی کردی۔ علی امین گنڈا پور کیخلاف تھانہ گولڑہ میں مقدمہ درج ہے۔
