بھارتی ٹیم کے کپتان روہت شرما کو آئی سی سی چیمپئنز ٹرافی جیتننے کا انعام مل گیا۔
بھارتی میڈیا کے مطابق روہت شرما کو ٹیسٹ ٹیم کا کپتان برقرار رکھنے کا فیصلہ کیا گیا ہے، وہ انگلینڈ کیخلاف ٹیسٹ سیریز میں بھارتی ٹیم کی قیادت کریں گے۔
روہت شرما کی قیادت میں بھارتی ٹیم چیمپئنز ٹرافی 2025ء میں ناقابل شکست رہی تھی۔
چیمپئنز ٹرافی کی جیت کے بعد سلیکٹرز نے روہت شرما پر نئے سرے سے اعتماد کا اظہار کیا اور کہا کہ ان کی جیت کے ساتھ مینجمنٹ اور میچ کی صورتحال کو جانچنے کی صلاحیت شاندار رہی۔
بھارتی میڈیا کے مطابق روہت شرما کو جون سے اگست تک ہونیوالے دورۂ انگلینڈ کیلئے اعتماد کا ووٹ مل گیا ہے، روہت شرما کو یہ یقین دہانی بھی کرا دی گئی ہے کہ وہ انگلینڈ میں کپتان ہوں گے۔
خیال رہے کہ آسٹریلیا کیخلاف بورڈر گواسکر ٹرافی میں شکست کے بعد روہت شرما کی کپتانی خدشات کا شکار تھی، اس ایونٹ میں کپتان روہت شرما کی انفرادی کارکردگی بھی ناقص رہی تھی، انہوں نے 3 ٹیسٹ میچز میں صرف 31 رنز بنائے تھے جبکہ سیریز کے آخری ٹیسٹ میں روہت شرما کو ڈراپ بھی کردیا گیا تھا۔
