حکومت نے عالمی مالیاتی فنڈ (آئی ایم ایف) کو بجلی پر ان ٹارگٹڈ سبسڈیز ختم کرنے کی یقین دہانی کرادی، کم یونٹ استعمال کرنے والے صارفین کے لیے بلوں میں اضافے کا خدشہ پیدا ہو گیا ہے۔
ذرائع وزارت توانائی کے مطابق تمام صارفین سے بجلی کی قیمت پوری وصول کی جائے گی، صرف بی ائی ایس پی میں رجسٹرڈ کم آمدن صارفین کو سبسڈی ملے گی، 500 ارب کی سبسڈی بی آئی ایس پی کو منتقل کی جائے گی۔
ذرائع کے مطابق 300 یونٹ تک بجلی استعمال کرنے والے صارفین کے متاثر ہونے کا خدشہ ہے۔ ایک سے زائد میٹر استعمال کرکے سستی بجلی لینے والے صارفین بھی زد میں آئیں گے۔
جنوری 2027 سے صرف بی آئی ایس پی کے ذریعے سبسڈی دینے کا پلان ہے۔ پروٹیکٹڈ صارفین کی تعداد ایک کروڑ سے بڑھ کر 2کروڑ 20لاکھ تک ہوچکی، 2 سے 3 میٹرز کی وجہ سے پروٹیکٹڈ صارفین بڑھ رہے ہیں۔
پاور ڈویژن نے بجلی بلز میں دی جانے والی سبسڈی کو پبلک کرنے کا بھی فیصلہ کرلیا۔ آئندہ بلوں میں بجلی کی اصل قیمت کے ساتھ سبسڈی کی رقم بھی لکھی جائے گی۔
حکام پاور ڈویژن کے مطابق موجودہ سبسڈی سسٹم ختم کرنے کیلئے نیا طریقہ کار تیار کیا جا رہا ہے، حکومت اگست تک نئے سبسڈی سسٹم کو ٹیسٹ کرے گی، بجلی صارفین کا ڈیٹا بی آئی ایس پی رجسٹری سے منسلک کیا جائے گا۔
حکومت نے آئی ایم ایف کو توانائی اصلاحات کو ماحولیاتی اہداف سے بھی جوڑنے کی یقین دہانی کرادی، ماحول دوست منصوبوں کیلئے 250 ملین ڈالر پانڈا بانڈ جاری کیا جائے گا۔
حکومت اگلے سال سے کسانوں سے ڈیجیٹل آبپاشی ٹیکس لینے پر بھی غور کررہی ہے، اکٹھی ہونے والی رقم سے آبپاشی کے نظام کو مکمل ڈیجیٹلائز کیا جائے گا، ترقیاتی منصوبوں میں کلائمیٹ ترجیح 30 فیصد تک بڑھانے کا وعدہ ہے، پاکستان کو موسمیاتی خطرات سے نمٹنے کیلئے جدید نظام ضروری قراردیا گیا ہے۔
