سعودی ویژن 2030 کے تحت آئندہ برسوں میں پاکستانی عازمین حج کا لباس ایک ہی رکھنے کی تجویز دی گی ہے۔ وزیر مذہبی امور نے اختیارات نہ ہونے کا پروپیگنڈا مسترد کر دیا۔
سینیٹ کی قائمہ کمیٹی مذہبی امور کے رکن دنیش کمار نے کہا تاثر ہے وفاقی وزیر مذہبی امور وزارت کے معاملات میں بے بس ہیں اور ساری ڈیلنگ ڈاکٹر توقیر شاہ کر رہے ہیں ۔ وزیرمملکت نے بھی بیان دیا کہ انہیں وزارت کے معاملات سے بے خبر رکھا جاتا ہے۔
وفاقی وزیر مذہبی امور سردار یوسف نے الزامات کو مسترد کرتے ہوئے کہا بطور وزیر تمام اختیارات ان کے پاس ہیں اور ان باتوں میں کوئی حقیقت نہیں ۔ اجلاس میں بتایا گیا کہ حج خدمات کے لئے سعودی عرب میں دو کمپنیوں کا انتخاب کیا گیا ہے، ایک ہزار 780 حج معاونین اور میڈیکل مشن ارکان سعودی عرب جائیں گے۔
وزیر مذہبی امور نے بتایا پرائیویٹ حج آپریٹرز کی فہرست میں نئی کمپنیوں کی شمولیت پر پابندی نہیں ہوگی اور معیار پر پورا اترنے والوں کو آئندہ کوٹہ دیا جائے گا ۔
تحریک انصاف کی جانب سے قائمہ کمیٹیوں کے بائیکاٹ کے باعث اپوزیشن رکن علی ظفر کا فیملی لاز بل ایجنڈے سے ہٹانے کا فیصلہ کیا گیا۔
