پاکستان آرمی ٹیم اسپرٹ مقابلوں 2026 کی نویں بین الاقوامی مشق کی افتتاحی تقریب نیشنل کاؤنٹر ٹیررازم سینٹر (این سی ٹی سی) پبی میں منعقد ہوئی۔ مشق میں جسمانی فٹنس، ذہنی مضبوطی اور فیصلہ سازی پرخصوصی توجہ دی گئی۔
آئی ایس پی آر کے مطابق انٹرنیشنل پاکستان آرمی ٹیم اسپرٹ مقابلوں کی پبی میں افتتاحی تقریب منعقد ہوئی، جس میں 19 دوست ممالک کی 24 ٹیمیں حصہ لے رہی ہیں۔ امریکا، ترکیہ، سعودی عرب، مصر، عراق اور قطر سمیت متعدد ممالک مقابلوں میں شریک ہیں، جبکہ انڈونیشیا، میانمار اور تھائی لینڈ مبصرین کی حیثیت سے شامل ہیں۔
آئی ایس پی آر کے مطابق پاکستان آرمی اور نیوی کی سولہ ملکی ٹیمیں بھی ان مقابلوں کا حصہ ہیں۔ بیان کے مطابق اس مشق کا مقصد عسکری تعاون، پیشہ ورانہ مہارت اور باہمی ہم آہنگی کو فروغ دینا ہے۔
پاکستان آرمی ٹیم اسپرٹ ایک مشن مخصوص اور ٹاسک پر مبنی پیشہ ورانہ فوجی مشق ہے، جس میں جسمانی فٹنس، ذہنی مضبوطی اور فوری فیصلہ سازی پر خصوصی توجہ دی جاتی ہے۔ آئی ایس پی آر کا کہنا ہے کہ مشقیں حقیقی جنگی ماحول سے قریب تر حالات میں انجام دی جاتی ہیں اور ان کا بنیادی مقصد ٹیم اسپرٹ کے ذریعے استقامت اور باہمی اعتماد کو مضبوط بنانا ہے۔
