متحدہ قومی موومنٹ پاکستان نے بلاول بھٹو کی تقریر کو مضحکہ خیز اور حقائق کے منافی قرار دیدیا اور کہا بلاول کی تقریر سوشل میڈیا کانٹینٹ کریئٹر جیسی جبکہ زمینی حقائق اس کے برعکس ہیں ، 17 برس نہیں، پانچ دہائیوں کی حکمرانی کا سچ عوام کے سامنے لایا جائے۔
اپنے ایک بیان میں ایم کیو ایم پاکستان کاکہناتھا کہ سندھ سرکار کی نااہلیوں، بدعنوانیوں کو بلاول بھٹو سینکڑوں پریزینٹیشن سے بھی دھونہیں سکتے ، ہیلی کاپٹر سے سیوریج کا پانی بھی جھیل نظر آتا ہے جبکہ زمینی حقائق مختلف ہیں ، سندھ کی کرپٹ سرکار نے کراچی کو دنیا کے بدترین شہروں کی صف میں لاکھڑا کیا ہے ۔ شہروں اور دیہات میں بنیادی ڈھانچے، صاف پانی، تعلیم اور صحت کی صورتحال ابتر ہے،پیپلز پارٹی کی سیاست گمراہ کن تفریق اور عوامی حقوق سلب کرنے پر مبنی ہے،لسانیت اور موروثی سیاست کے بانی کس منہ سے جمہوریت کی بات کر رہے ہیں؟، ترقیاتی دعوؤں کے بجائے حقیقی عوامی فلاح پر توجہ دی جائے۔
