وزیراعظم شہباز شریف نے کہا ہے کہ پاکستانی نوجوانوں کو بین الاقوامی معیار کی آئی ٹی شعبے کی تعلیم و تربیت فراہم کرنا حکومت کی اولین ترجیحات میں شامل ہے،آئی ٹی کی ترقی کے لیے قائم کی گئی عرفہ کریم فاؤنڈیشن کا قیام ایک خوش آئند عمل ہے جس کی حکومتی سطح پر ہر ممکن مدد کو یقینی بنایا جائے گا۔
وزیراعظم آفس سے جاری بیان کے مطابق وزیراعظم شہباز شریف نے ان خیالات کا اظہار آئی ٹی ماہر مرحومہ عرفہ کریم رندھاوا کے والدین ثمینہ امجد، امجد کریم رندھاوا اور عرفہ کریم فاؤنڈیشن کی چیف ایگزیکٹو تابندہ اسلام سے گفتگو کرتے ہوئے کیا جنہوں نے وزیراعظم سے ملاقات کی۔
وزیراعظم نے عرفہ کریم کی کم عمری میں ہی آئی ٹی کے میدان میں خدمات اور پاکستان کا نام روشن کرنے پر انہیں خراج تحسین پیش کیا۔وزیرِ اعظم نے کہا کہ عرفہ کریم کی آئی شعبے میں لازوال خدمات کے اعتراف میں لاہور میں واقع آئی ٹی ٹاور کو مرحومہ کے نام سے منسوب کیا گیا جو اب عرفہ کریم ٹاور کے نام سے جانا جاتا ہے،پاکستان کو خطے میں آئی ٹی شعبے کا مرکز بنانے کیلئے حکومت دن رات کوشاں ہے۔
وزیرِ اعظم نے کہا کہ نوجوانوں کو آئی ٹی کی تعلیم و تربیت اور آئی ٹی شعبے میں انٹر پرینیورشپ کی حوصلہ افزائی کی جارہی ہے،رواں برس بھی وفاقی حکومت کی جانب سے اعلی کارکردگی دکھانے والے طلباء و طالبات میں لیپ ٹاپس تقسیم کئے جارہے ہیں۔ عرفہ کریم مرحوم کے والدین نے وزیرِ اعظم کی زیر قیادت آئی ٹی شعبے کی ترقی کیلئے حکومت کے اقدامات کو سراہا۔
