سیکیورٹی فورسز کے ہاتھوں خوارج کی مسلسل ہلاکتوں کے بعد دہشت گردوں نے بزدلانہ وار کرتے ہوئے شمالی وزیرستان میں معصوم بچوں اور خواتین کو نشانہ بنایا۔
سیکیورٹی ذرائع کے مطابق 17 اکتوبر کو شمالی وزیرستان کے علاقے میر علی میں کھادی پوسٹ پر فتنہ الخوارج کے دہشت گردوں نے خودکش حملہ کیا۔ دھماکے کے نتیجے میں تین خواتین اور دو بچے جاں بحق ہوگئے۔ سیکیورٹی فورسز نے چار دہشت گردوں کو جہنم واصل کر دیا۔
ذرائع کے مطابق اس بزدلانہ کارروائی کی ذمہ داری خارجی گل بہادر گروپ نے قبول کی جو افغان طالبان کی سرپرستی میں افغانستان میں چھپا ہوا ہے۔
سیکیورٹی ذرائع کا کہنا ہے کہ فتنہ الخوارج کے دہشت گرد اپنی ناکامیوں کے بعد خیبر پختونخوا کے معصوم شہریوں کو نشانہ بنا رہے ہیں۔ سیکیورٹی فورسز ملک سے دہشت گردی کے مکمل خاتمے کے لیے پرعزم ہیں۔
