وفاقی وزیر خزانہ محمد اورنگزیب سرکاری دورے پر امریکا پہنچ گئے۔ وزیر خزانہ اپنے 6 دن کے دورہ کے دوران 65 سے زائد ایونٹس،فورمز، تقریبات، نشستوں اور ملاقاتوں میں شریک ہوں گے۔ دورے میں گورنر اسٹیٹ بینک سمیت معاشی ٹیم کے دیگر ارکان وزیر خزانہ کے ہمراہ ہیں۔
امریکا میں پاکستانی وفد آئی ایم ایف اور ورلڈ بینک کے سالانہ اجلاسوں میں شرکت کرے گا۔ وزیر خزانہ آئی ایم ایف، ورلڈ بینک، انٹرنیشنل فنانس کارپوریشن حکام سے ملیں گے۔ ملٹی لیٹرل انویسٹمنٹ گارنٹی ایجنسی کے حکام ،عالمی بینک کے صدر اجے بنگا سے ملاقاتیں طے ہیں۔
وزیر خزانہ صدر عالمی بینک کے عشائیے میں شریک ہوں گے۔ آئی ایم ایف کی منیجنگ ڈائریکٹر کرسٹلینا جارجیوا سے بھی ملاقات ہوگی۔ ایف بی آر کی ڈیجیٹل ٹرانسفارمیشن کے حوالے سے عالمی بینک کے زیر اہتمام منعقدہ علاقائی راؤنڈ ٹیبل اجلاس اور ورلڈ اکنامک فورم کے دو اہم ایونٹس میں شرکت ہوگی۔
سینیٹر محمد اورنگزیب چین، برطانیہ، سعودی عرب، ترکیہ اور آذربائیجان کے ہم منصب قائدین سے ملاقاتیں کریں گے۔ کانگرس کی فنانشل سروسز کمیٹی کے چئیر مین ،امریکی اسٹیٹ، ٹریثری ڈیپارٹمنٹس ، انٹرنیشنل ڈیویلپمنٹ فنانس کارپوریشن ، یو ایس پاکستان بزنسل کونسل کے عہدیداران سمیت کئی دیگر اعلیٰ حکام سے ملاقاتیں ہوں گی۔
وزیر خزانہ منتخب بین الاقوامی اور امریکی ذرائع ابلاغ کے نمائندوں کو انٹرویوز بھی دیں گے۔ عالمی کریڈٹ ریٹنگز ایجنسیوں، کمرشل بنکوں بالخصوص مشرق وسطی کے سرمایہ کار بنکوں کے حکام سے بھی ملاقاتیں ہوں گی۔
