ترجمان الیکشن کمشنرسندھ نے کراچی سمیت سندھ کی 52 خالی بلدیاتی نشستوں پر ضمنی انتخاب کیلئے شیڈول جاری کردیا، پولنگ 24 ستمبر کو ہوگی۔
ترجمان کا کہنا ہے کہ شکارپور، کشمور، گھوٹکی، سکھر میں بلدیاتی نشستوں پر ضمنی انتخاب ہوگا، نوشہروفیروز، حیدرآباد، جامشورو، مٹیاری، کراچی میں غربی، کیماڑی اور شرقی میں بھی ضمنی انتخاب ہوگا۔
ترجمان الیکشن کمشنر سندھ کے مطابق سندھ بھر کی 52 خالی بلدیاتی نشستوں پر انتخاب 24 ستمبر کو ہوگا، کاغذات نامزدگی جمع کروانے کا مرحلہ 21 تا 23 اگست تک جاری رہے گا۔
ترجمان کے مطابق کراچی کے 3 اضلاع کی 5 بلدیاتی نشستوں پر ضمنی انتخابات ہوں گے، ٹی ایم سی سہراب گوٹھ کی یو سی 8 میں وائس چیئرمین کی نشست، ٹی ایم سی منگھو پیر یو سی 10 میں وائس چیئرمین کی نشست اور ٹی ایم سی اورنگی کی یوسی نمبر 1 اور 7 پر چیئرمین، جنرل ممبر کی نشست پر ضمنی انتخاب ہوں گے جبکہ میونسپل کارپوریشن بلدیہ کی یو سی 8 میں وائس چیئرمین کی نشست پر انتخاب ہوگا۔
