کراچی انٹر بورڈ کے گیارہویں جماعت کے طلباء کی اکثریت فیل ہونے کا معاملے پر سندھ اسمبلی کی پارلیمانی کمیٹی کی ہدایت پر 26 ہزار طلباء کے پرچوں کی اسکروٹنی کا عمل مکمل کرلیا گیا، اسکروٹنی نتائج میں 97 فیصد طلباء کے نتائج درست قرار پائے، مجموعی طور پر صرف 830 طلباء کے نتائج میں معمولی تبدیلی آئی۔
ذرائع کے مطابق کراچی انٹربورڈ کے گیارہویں جماعت کے طلباء کی اکثریت فیل ہونے کے معاملے پر سندھ اسمبلی کی پارلیمانی کمیٹی کی ہدایت پر 26 ہزار طلباء نے پرچوں کی اسکروٹنی کروائی، اسکروٹنی نتائج میں 97 فیصد طلباء کے نتائج درست قرار پائے۔
ذرائع کا کہنا ہے کہ سائنس گروپ میں 6 ہزار 174 امیدواروں کے نتائج کی دوبارہ چانچ کی گئی، میڈیکل گروپ کے 10 ہزار 302 امیدواروں کے نتائج دوبارہ چیک کیے گئے جبکہ انجینئرنگ گروپ کے 9 ہزار سے زائد امیدواروں کے نتائج کی دوبارہ جانچ ہوئی۔
ذرائع کے مطابق طلباء کو ماہر اساتذہ و والدین کی موجودگی میں کاپیاں بھی چیک کروائی گئیں، 26 ہزار امیدواروں میں سے صرف 830 طلباء کے نتائج میں معمولی تبدیلی سامنے آئی۔
ذرائع کا کہنا ہے کہ اسکروٹنی نتائج پارلیمانی کمیٹی و محکمہ بورڈز کو ارسال کیے جائیں گے۔
