صدر مملکت آصف علی زرداری نے کہا ہے کہ روس موجودہ علاقائی صورتحال بہتر کرنے میں اہم کردار ادا کرسکتا ہے۔
صدر مملکت آصف علی زرداری نے دوسری جنگ عظیم میں نازی ازم کے خلاف روس کی تاریخی فتح کی 80ویں سالگرہ کے موقع پر منعقدہ تقریب سے خطاب کرتے ہوئے روس کے صدر، حکومت اور عوام کو مبارکباد پیش کی۔
آصف زرداری نے کہا کہ یہ فتح جنگ اور امن کی قیمت کی یاد دہانی کراتی ہے اور روسی عوام کی طاقت اور امن و خوشحالی کے لیے روس کے مضبوط عزم کی عکاسی کرتی ہے۔
صدر زرداری نے زور دیا کہ دوسری جنگ عظیم میں موجودہ پاکستان کے علاقوں سے تعلق رکھنے والے افراد نے بھی نازی ازم کو شکست دینے میں اہم کردار ادا کیا۔
انہوں نے اپنے 2011 کے دورہ روس کو یادگار قرار دیتے ہوئے کہا کہ صدر ولادیمیر پیوٹن نے پاک-روس دوستی کو فروغ دینے میں کلیدی کردار ادا کیا ہے۔
انہوں نے کہا کہ حالیہ اعلیٰ سطحی تبادلوں نے دونوں ممالک کے درمیان بہتر تعلقات اور افہام و تفہیم کی مضبوط بنیاد رکھی ہے۔
صدر زرداری نے روس کو ایک اہم عالمی طاقت اور علاقائی امن و استحکام کے لیے کلیدی عنصر قرار دیتے ہوئے کہا کہ پاکستان اور بھارت کے درمیان بڑھتی ہوئی کشیدگی کے تناظر میں روس موجودہ صورتحال کو بہتر بنانے میں اہم کردار ادا کر سکتا ہے اور کر رہا ہے۔
صدر مملکت نے پاک-روس دوستی کے مزید مضبوط ہونے پر یقین ظاہر کیا اور تجارت، سرمایہ کاری، ٹیکنالوجی اور عوامی روابط کے شعبوں میں تعاون کو وسعت دینے کی ضرورت پر زور دیا۔
انہوں نے دونوں ممالک کے درمیان مفاہمت اور تعاون بڑھانے کے عزم کا اعادہ کرتے ہوئے کہا کہ خطے اور دنیا کے بہتر مستقبل کے لیے دونوں ممالک کو مل کر کام کرنا چاہیے۔
