پاکستان سپر لیگ (پی ایس ایل) 10 میں کراچی کنگز کو بڑا دھچکا لگ گیا، کیوی فاسٹ بولر ایڈم ملنے گٹھنے کی انجری کے باعث ٹورنامنٹ سے باہر ہوگئے۔
پاکستان سپر لیگ 10 کے 15 اپریل کو لاہور قلندرز اور کراچی کنگز کے درمیان میچ میں دائیں ہاتھ سے بولنگ کرنیوالے نیوزی لینڈ کے فاسٹ بولر ایڈم ملنے انجری کا شکار ہوئے۔
رپورٹ کے مطابق ایڈم ملنے ٹیم کے ساتھ رہ کر صحتیابی کی امید کررہے تھے لیکن طبی معائنے کے بعد تصدیق ہوگئی کہ وہ پی ایس ایل کے اس سیزن میں مزید میچز نہیں کھیل سکیں گے۔
کراچی کنگز کی مینجمنٹ نے ایڈم ملنے کی خدمات پر ان کا شکریہ ادا کیا اور ان کی جلد اور مکمل صحتیابی کیلئے نیک خواہشات کا اظہار کیا۔
واضح رہے کہ ایڈم ملنے نے انجری سے قبل کراچی کنگز کے 2 میچز میں حصہ لیا تھا۔
کراچی کنگز نے ایڈم ملنے کی جگہ نوجوان کھلاڑی سعد بیگ کو اس سیزن کیلئے مستقل طور پر اسکواڈ میں شامل کرلیا ہے، وہ پاکستان انڈر 19 ٹیم کے کپتان بھی ہیں۔
گزشتہ روز کوئٹہ گلیڈی ایٹرز نے کراچی کنگز کو دلچسپ مقابلے کے بعد 5 رنز سے شکست دی تھی، پوائنٹس ٹیبل پر کراچی کنگز 6 پوائنٹس کے ساتھ دوسرے نمبر پر ہے۔
