بشریٰ بی بی کیخلاف 26 نومبر کے بعد درج ہونیوالے 31 مقدمات کی اڈیالہ جیل میں سماعت ہوئی، بشریٰ بی بی نے مقدمات میں شامل تفتیش ہونے کیلئے بانی پی ٹی آئی سے ملاقات اور مشاورت کی شرط رکھ دی۔ عدالت نے ملزمہ کی ضمانت میں توسیع کرتے ہوئے ملاقات کا حکم دے دیا۔
اڈیالہ جیل راولپنڈی میں بانی پی ٹی آئی کی اہلیہ بشریٰ بی بی کے 26 نومبر کے بعد درج ہونیوالے 31 مقدمات کی سماعت ہوئی، انسداد دہشت گردی عدالت راولپنڈی کے جج امجد علی شاہ نے سماعت 7 مارچ تک ملتوی کردی
بشریٰ بی بی کو کمرہ عدالت میں پیش کیا گیا، تفتیشی افسران بھی عدالت میں پیش ہوئے۔ سابق خاتون اول نے کہا کہ شامل تفتیش ہونے سے قبل بانی پی ٹی آئی اور اپنے وکیل سلمان صفدر سے مشاورت کرنی ہے، مشاورت کے بعد اپنا بیان ریکارڈ کروانے کیلئے تیار ہوں۔
بشریٰ بی بی نے کہا کہ اگر آج ملاقات کروا دی جائے تو آج ہی شامل تفتیش ہونے کو تیار ہوں، انہوں نے بانی پی ٹی آئی کی موجودگی میں شامل تفتیش ہونے کی بھی عدالت سے درخواست کی۔
عدالت نے ایس او پی کے مطابق بشریٰ بی بی کی بانی پی ٹی آئی اور وکیل سے ملاقات کروانے کا حکم دیدیا۔ اے ٹی سی نے 31 مقدمات میں بشریٰ بی بی کی ضمانت میں بھی 7 مارچ تک توسیع کردی۔
