افغانستان کرکٹ ٹیم کے کھلاڑی گلبدین نائب کا کہنا ہے کہ آسٹریلیا کیخلاف جیت ہماری کرکٹ کیلئے بڑی کامیابی ہے۔
یاد رہے کہ آئی سی سی ٹی 20 ورلڈ کپ کے سپر ایٹ مرحلے میں افغانستان نے آسٹریلیا کو شکست دے کر پہلی بار کینگروز کے خلاف کامیابی سمیٹی ہے۔
افغان کھلاڑی گلبدین نائب کی اعلیٰ کارکردگی نے ٹیم کی کامیابی میں اہم کردار ادا کیا اور وہ 20 رنز کے عوض 4 وکٹیں حاصل کرنے پلیئر آف دی میچ بھی قرار پائے۔
میچ کے بعد گفتگو کرتے ہوئے گلبدین نائب کا کہنا تھا کہ ہم ایک طویل عرصے سے اس کا انتظار کر رہے تھے، یہ نہ صرف میرے لیے بلکہ میری قوم اور میرے لوگوں کے لیے بہت اچھا لمحہ ہے۔
گلبدین نائب کا کہنا تھا کہ یہ ہماری کرکٹ کے لیے ایک بڑی کامیابی ہے، ہمارے کیریئر اور کرکٹ کے سفر کو سپورٹ کرنے کے لیے شائقین کا شکریہ، یہ ایک بہترین ٹیم ورک ہے، ہم نے گزشتہ دو ماہ سے سخت محنت کی اور نتیجہ سامنے ہے۔
ان کا کہنا تھا کہ اگر آپ ہماری کرکٹ کی تاریخ کو دیکھیں تو یہ زیادہ نہیں ہے، پچھلے 10 سالوں میں ہم نے بہت سے اہداف حاصل کیے ہیں۔
