بھارتی کرکٹ ویب سائٹ کے مطابق ٹی 20 ورلڈکپ میں بنگلہ دیش کے میچز انڈیا سے سری لنکا منتقل کرنے کے امکانات کم ہیں تاہم بھارت میں ہی بنگلہ دیش کے میچز کے وینیوز کی تبدیلی کا آپشن سامنے آیا ہے۔
رپورٹ کے مطابق آئی سی سی اور بنگلا دیش کرکٹ بورڈ کے درمیان موقف سے دستبرداری کی جنگ جاری ہے، بنگلا دیش کے میچز کے لیے چنائی اور تھیرو وننتھاپورم کے وینیوز کے آپشنز ہیں۔
بنگلا دیش کرکٹ بورڈ نے اپنے تمام میچز سری لنکا منتقل کرنے کہا ہوا ہے، سیکورٹی خدشات کے باعث بی سی بی نے آئی سی سی باضابطہ مطالبہ کر رکھا ہے، آئی سی سی نے متبادل وینیوز ضرور تلاش کیے ہیں ، میچز سری لنکا منتقل ہونے کا امکان کم ہے۔
ویب سائٹ کے مطابق تامل ناڈو اور کیرالا کرکٹ ایسوسی ایشن سے آئی سی سی اور بی سی سی آئی نے رابطہ کیا ہے، چنائی اور تھیرووننتھا پورم بنگلا دیش کے میچز کے لیے ممکنہ وینیوز ہو سکتے ہیں۔
بنگلا دیش کے 7 ، 9 اور 14فروری کو کولکتہ جبکہ 17 فروری کو ممبئی میں میچز شیڈولڈ ہیں تاہم بھارتی انتہا پسندوں کے دباو کے بعد بنگلا دیش کے فاسٹ بولر مستفیض الرحمان کو بھارتی بورڈ نے آئی پی ایل سے ریلیز کرنے کا حکم دیا تھا، جس کے بعد بنگلا دیش کرکٹ بورڈ نے ٹیم کو انڈیا نہ بھیجنے کا اعلان کیا۔
