این ڈی ایم اے نے کل سے 2 ستمبر تک اسلام آباد سمیت ملک کے مختلف علاقوں میں بارشوں کی پیشگوئی کر دی ہے ۔
ترجمان این ڈی ایم اے کے مطابق پنجاب کے شمالی و شمال مشرقی اضلاع میں 30 اور 31 اگست کے دوران شدید بارشیں متوقع ہیں ، راولپنڈی،اٹک، جہلم،چکوال، لاہور،گوجرانوالہ،سیالکوٹ،گجرات، نارووال،حافظ آباد،منڈی بہاؤالدین میں بارش کا امکان ہے۔
وسط وجنوبی پنجاب میں 29 تا 31 اگست کے دوران بارشیں متوقع ہیں،نشیبی علاقے زیرآب آنے کا خدشہ بھی ہے ، ملتان، ڈی جی خان، راجن پور،لیہ، بھکر،ساہیوال، بہاولپور،بہاولنگر اوررحیم یارخان میں سیلاب کا خدشہ ہے۔
خیبر پختونخواہ میں کل سے شدید بارشیں، ملاکنڈ و ہزارہ ڈویژن میں لینڈ سلائیڈنگ کا خدشہ ہے ، چترال، دیر،سوات، بونیر،مانسہرہ، ایبٹ آباد،پشاور،نوشہرہ،مردان، ڈی آئی خان،کوہاٹ اور بنوں میں بارش متوقع ہے۔
مظفرآباد، باغ، حویلی، کوٹلی، میرپور، بھمبرمیں 29 اگست تا 2 ستمبر کے دوران شدید بارشیں متوقع ہیں، گلگت بلتستان میں بارش ، لینڈ سلائیڈنگ اور گلیشیائی جھیلوں کے پھٹنے کا خدشہ ہے۔ گلگت بلتستان کےاضلاع میں گلگت، سکردو، ہنزہ، دیامر، استور، غذر اورگانچھےشامل ہیں ۔
سندھ کے ساحلی اضلاع کراچی، ٹھٹھہ، سجاول، بدین، تھرپارکر میں 30 اگست تا 2 ستمبر کے دوران بارشیں متوقع ہیں، کراچی میں ممکنہ شدید بارشوں کے باعث شہری سیلاب کا خدشہ ہے ۔
اندرون سندھ کے اضلاع بشمول حیدرآباد، دادو، سکھر، گھوٹکی، لاڑکانہ، جیکب آباد، کشمور میں 30 اگست تا یکم ستمبر موسلا دھار بارشوں کا امکان ہے ۔
بلوچستان کے ساحلی و مشرقی اضلاع بشمول گوادر، کیچ، پنجگور، خضدار، لسبیلہ، قلات میں 29 اگست تا یکم ستمبر تک بارشیں ہو سکتی ہیں جس سے نشیبی علاقوں میں سیلاب کا خدشہ ہے ۔
ممکنہ مزید بارشوں کے نتیجے میں دریائے راوی،ستلج اور چناب کے ملحقہ علاقوں میں سیلابی صورتحال میں مزید شدت متوقع ہے ۔کسی بھی ایمرجنسی کی صورت میں فوری طور پر مقامی انتظامیہ اور ریسکیو حکام سے رابطہ کریں۔
متاثرہ علاقوں میں این ڈی ایم اے تمام متعلقہ اداروں کی جانب سے جاری امدادی کاروائیوں کی ہمہ وقت نگرانی کر رہا ہے۔ہنگامی صورتحال سے نمٹنے کے لیے تمام ادارے اقدامات کو یقینی بنا رہے ہیں۔
ممکنہ طور پر مزید بارشوں کی صورت میں پہاڑی علاقوں میں لینڈ سلائیڈنگ اور دریاؤں کے ملحقہ علاقوں میں سیلابی صورتحال کا خدشہ ہے۔بارشوں اور سیلاب کے دوران محتاط رہیں اور حفاظتی اقدامات یقینی بنائیں۔
سیاح حضرات سے التماس ہے کہ ممکنہ بارشوں اور لینڈ سلائیڈنگ کے خطرے کے پیش نظر شمالی علاقہ جات کا سفر کرنے سے گریز کریں۔
