جمعیت علماء اسلام کے سربراہ مولانا فضل الرحمٰن نے مطالبہ کیا ہے کہ امریکی صدر ڈونلڈ ٹرمپ کا امن سے متعلق دعویٰ جھوٹا ثابت ہوگیا اس لیے ان کے لیے نوبل انعام کی تجویز واپس لی جائے۔
اتوار کو مری میں پارٹی اجلاس سے خطاب کرتے ہوئے سربراہ جے یو آئی مولانا فضل الرحمان نے سوال اٹھایا کہ امریکا کے ہاتھوں پر افغانستان اور فلسطینیوں کا خون بہہ رہا ہے ، وہ کیسے امن کا داعی بن سکتا ہے ؟۔
سربراہ جے یو آئی کا کہنا تھا کہ اس وقت خطے کی صورتحال باعث تشویش ہے ، دنیا میں اس وقت معیشت کی جنگ چل رہی ہے اور مشرق وسطیٰ میں چینی اقتصادیات کو فروغ مل رہا ہے، ایسے وقت میں امریکا طاقت کا مظاہرہ کر کے اس کو روکنے کی کوشش کر رہا ہے۔
مولانا فضل الرحمٰن کا کہنا تھا کہ ٹرمپ امن کے نعرہ کے ساتھ صدارتی انتخاب جیتا لیکن اپنے دعویٰ میں جھوٹا ثابت ہوا، فلسطین اور لبنان پر اور شام پر اسرائیلی حمایت کرنا کون سا امن ہے؟۔
ان کا کہنا تھا کہ پاکستان نے بھارت کی دفاعی قوت کو تباہ کردیا تو امریکی بیچ میں آگئے اور کہا جنگ بندی کرائی۔
انہوں نے کہا کہ امریکی صدر نے ہمارے آرمی چیف کو کھانے پر بلایا جس کے بعد حکمران خوش ہوئے کہ صدر ٹرمپ کو نوبل انعام دینے کی سفارش کر دی۔
