لاہور قلندرز کے اہم آل راؤنڈر سکندر رضا ٹیم کو چھوڑ کر انگلینڈ روانہ ہوگئے، وہ زمبابوے کی طرف سے انگلینڈ کیخلاف تاریخی ٹیسٹ میں شرکت کرینگے۔
پاکستان سپر لیگ 10 میں لاہور قلندرز نے گزشتہ روز پشاور زلمی کو شکست دے کر پلے آف مرحلے میں جگہ بنائی تھی۔
رپورٹ کے مطابق لاہور قلندرز کے اہم آل راؤنڈر سکندر رضا اپنی قومی ذمہ داری کو پورا کرنے کیلئے ٹیم کو چھوڑ کر چلے گئے ہیں، وہ ناٹنگھم میں انگلیڈ کیخلاف تاریخی ٹیسٹ میچ میں شرکت کریں گے۔
یہ ٹیسٹ میچ زمبابوے کا انگلینڈ کی سرزمین پر 2003ء کے بعد پہلا ٹیسٹ میچ ہوگا، جبکہ 2004ء کے بعد پہلی مرتبہ زمبابوے کی ٹیم کسی بھی فارمیٹ میں انگلینڈ میں بین الاقوامی کرکٹ کھیلنے جارہی ہے۔
سکندر رضا نے پاکستان سپر لیگ 10 کے گروپ مرحلے میں لاہور قلندرز کی نمائندگی کرتے ہوئے 10 میچز میں 232 رنز اسکور کیے، ان کا اسٹرائیک ریٹ 162.23 رہا، 2 نصف سنچریوں اور کئی اہم اننگز کے ساتھ وہ قلندرز کی پلے آف مرحلے تک رسائی میں کلیدی کردار ادا کرتے رہے۔
لاہور قلندرز کے ٹیم ڈائریکٹر ثمین رانا نے سکندر رضا کی کارکردگی اور جذبے کو خراجِ تحسین پیش کرتے ہوئے کہا کہ سکندر صرف ایک کھلاڑی نہیں بلکہ ہمارے خاندان کا حصہ ہیں، ان کا عزم، توانائی اور جذبہ ٹیم کے ہر فرد کیلئے متاثر کن رہا، ہم انہیں شدت سے یاد کریں گے۔
برطانیہ روانگی سے قبل سکندر رضا نے جذباتی انداز میں کہا کہ لاہور قلندرز میرے دل کے بہت قریب ہے اور الوداع کہنا کبھی آسان نہیں ہوتا، لیکن قومی ذمہ داری سب سے پہلے ہے اور مجھے اپنے ملک کیلئے ایک بڑا فرض ادا کرنا ہے، میں دور بیٹھ کر پی ایس ایل کی ہر گیند دیکھوں گا اور اپنی ٹیم کو دل سے سپورٹ کروں گا، قلندرز ہمیشہ میرے دل میں رہیں گے۔
