انسداد دہشت گردی عدالت اسلام آباد نے پی ٹی آئی کارکنان کیخلاف 5 اکتوبر احتجاج پر درج مقدمات میں ملزمان کے چالان جمع نہ کرانے پر تفتیشی افسر کونوٹس کردیا۔
انسداد دہشت گردی عدالت کے جج طاہر عباس سپرا نے کیسز پر سماعت کی۔ عدالت کی جانب سے پیش ہونیوالے ملزمان کی حاضری کے بعد سماعت ملتوی کردی گئی۔
عدالت نے غیر حاضر ملزمان کو ایک بار پھر طلبی کے نوٹس جاری کردیئے۔ پراسیکوشن کیجانب سے 3 مقدمات کے چالان عدالت میں پیش کے گئے، اعظم سواتی سمیت مجموعی طور پر 31 ملزمان کی حد تک چالان پیش کیا گیا۔
جج طاہر عباس سپرا نے ریمارکس دیئے کہ میں آج آئی او سے جواب طلب کروں گا کہ ابھی تک بانی پی ٹی آئی سمیت دیگر ملزمان کا چالان کیوں نہیں آیا؟، اس تاریخ پر وارنٹ جاری نہیں کررہا بس نوٹس کررہا ہوں۔
جج طاہر عباس سپرا بولے اعظم سواتی کو کہیں وہ آج آکر اپنی حاضری لگوائیں، بانی پی ٹی آئی، عمر ایوب سمیت دیگر پی ٹی آئی قیادت بھی مقدمات میں نامزد ہے۔
عدالت نے دو مقدمات کی سماعت 13 جون جبکہ تھانہ بارہ کہو کے مقدمہ میں سماعت 2 جون تک ملتوی کردی، پی ٹی آئی رہنماؤں اور کارکنان کیخلاف تھانہ آبپارہ، سنگجانی و دیگر میں مقدمات درج ہیں۔
