پی ٹی آئی رہنماء جنید اکبر خان کا کہنا ہے کہ وزیراعلیٰ کے پی کا عاطف خان کے ساتھ اختلاف تھا، علی امین کو ہٹانے کی کوئی بات نہیں چل رہی، دونوں فریقین کو صبر و تحمل کا مظاہرہ کرنا چاہئے۔
پاکستان تحریک انصاف کے رہنماء جنید اکبر خان نے تصدیق کی ہے کہ وزیراعلیٰ کے پی علی امین گنڈاپور اور عاطف خان کے درمیان اختلافات تھے، وہ ان کے ساتھ نہیں چل سکے میرے ساتھ چل رہے ہیں۔
انہوں نے کہا کہ وزیراعلیٰ خیبرپختونخوا علی امین گنڈاپور کو ہٹانے کی کوئی بات نہیں چل رہی ہے، اس وقت ایسی باتوں سے اجتناب کرنا چاہئے، پارٹی کی سینئر قیادت نے وزیراعلیٰ کے پی کے بیان کے معاملے کا نوٹس لیا ہے۔
ان کا کہنا ہے کہ دونوں فریقین کو صبر اور تحمل کا مشورہ دیا گیا ہے، پولیٹکل کمیٹی معاملے کو جلد حل کر لے گی، پارٹی میں اختلافات ہوتے رہتے ہیں، سینئر قیادت سے اپیل ہے کہ اسکا ایک فورم ہونا چاہئے، اختلافات کا پارٹی پر کوئی اثر نہیں پڑتا، میرے اور وزیراعلیٰ کے درمیان بھی اختلافات تھے۔
جنید اکبر خان نے مزید کہا کہ اگلے ہفتے پورے صوبے میں احتجاجی تحریک کا آغاز ہوگا، احتجاج کیلئے جو حکم ہوگا وہ کریں گے۔
