وفاقی وزیر ریلوے حنیف عباسی کا کہنا ہے کہ فیصلہ ہوچکا معصوم انسانی جانوں سے کھیلنے والے دہشت گرد چاہے پاکستان میں ہوں یا بھاگ کر افغانستان یا کسی اور ملک چلے جائیں انہیں نہیں چھوڑا جائے گا۔
ریلوے ہیڈ کوارٹر لاہور میں پریس کانفرنس کرتے ہوئے وفاقی وزیر حنیف عباسی کا کہنا تھا کہ ریلوے کی بہتری کیلئے کام کر رہے ہیں، اسٹیشنز کی اپ گریڈیشن کو بھی دیکھ رہے ہیں، ریلوے پولیس کا اسکیل پنجاب پولیس کے برابر کردیا ہے۔
انہوں نے کہا کہ ہمیں سوچنا ہوگا ملک میں دہشتگردی نے دوبارہ سر کیوں اٹھایا؟، پوری دنیا کو سی پیک کھٹک رہا ہے، کوشش یہی کی جارہی ہے پایہ تکمیل تک نہ پہنچے۔
حنیف عباسی کا کہنا ہے کہ فیصلہ ہوچکا ہے کہ دہشتگرد جہاں بھی ہوں گے انکو نہیں چھوڑا جائے گا، پاکستان میں موجود دہشت گردوں کو نہیں چھوڑا جائے گا، یہ دہشت گرد اگر بھاگ کر افغانستان یا جہاں بھی جائیں گے تو ان کا پیچھا کیا جائے گا۔
وفاقی وزیر نے کہا کہ جعفر ایکسپریس کا اندوہناک واقعہ ہوا، کچھ لوگوں نے سیاسی فائدہ اٹھانے کی کوشش کی، اس واقعے کی مذمت تو امریکا اور اقوام متحدہ نے بھی کی لیکن ہمارے دشمنوں نے نہیں کی، اس سازش کو ہم سب نے مل کر ناکام بنانا ہے، ہمیں بھی جیلیں ہوئیں ہم نے کسی ادارے کو برا بھلا نہیں کہا۔
