قومی ٹیم کے سابق کپتان وسیم اکرم نے پاکستان کرکٹ بورڈ کی جانب سے نوکری پیشکش ٹھکرانے کی وجہ بیان کرتے ہوئے کہا کہ چیئرمین پی سی بی کرکٹ کے لیے بہت اچھا کام کر رہے ہیں پروفیشنل انداز میں چلا سکتے ہیں ، مجھے جاب کی آفر ہوئی لیکن میں 9 سے 5 جاب کرنے والا بندہ نہیں ہوں۔
سابق کپتان پاکستان کرکٹ ٹیم وسیم اکرم نے میلبرن میں آن لائن پریس کانفرنس سے خطاب کرتے ہوئے کہا کہ چیمپئِنز ٹرافی کے لیے بھارت سے اچھے اشارے مل رہے ہیں ، پی سی بی نے بھارتی بورڈ کو کئی آفرز کی ہیں ، انڈیا کو پاکستان آنا چاہیے ، ویراٹ کوہلی ، ہردیک پانڈیا اور سوریا کمار یا دیو کے بہت فینز ہیں ، انہیں شدت سے انتظار ہے ، دونوں ممالک کے لوگوں کا آپس میں رابطہ ہونا چاہیے بھارت اس بارے میں سوچے ، میں چھ سات سال سے انڈیا نہیں گیا ، میں وہاں کے کھانے اور لوگوں کو مس کرتا ہوں ۔
وسیم اکرم کا کہناتھا کہ بھارتی کھلاڑی پاکستان آئیں انجوائے کریں گے ، آسٹریلیا میں کنڈیشنز مشکل ہوتی ہیں ، آسان سیریز نہیں ہے ، ایک بھی ون ڈے جیت جاتے ہیں تو یہ بہت بڑی کامیابی ہے ، ٹی ٹونٹی سیریز اچھی ہو گی ۔
وسیم اکرم نے فخر زمان کے بابراعظم سے متعلق ٹویٹ پر تبصرہ کرتے ہوئے کہا کہ فخرزمان امپیکٹ پلئیر ہے ، مجھے یقین ہے کہ سوشل میڈیا بیان فخر نے نہیں لکھا ، جس نے بھی لکھا اسے بتانا چاہیے تھا کہ سنٹرل کنٹریکٹ کی وجہ سے آپ کو مسئلہ ہو سکتا ، میں سمجھتا ہوں کہ یہ فخر زمان کے لیے ایک سبق ہے ، سوچ سمجھ کر سوشل میڈیا پر لکھنا چاہیے ، پی سی بی کا اس معاملے پر اپ سیٹ ہونا بنتا تھا ۔
وسیم اکرم نے محسن نقوی کی کاوشوں کی تعریف اور نوکری کی آفر پر بات کرتے ہوئے کہا کہ چیئرمین پی سی بی کرکٹ کے لیے بہت اچھا کام کر رہے ہیں پروفیشنل انداز میں چلا سکتے ہیں ، مجھے جاب کی آفر ہوئی لیکن میں 9 سے 5 جاب کرنے والا بندہ نہیں ہوں ۔
سابق کپتان کا کہناتھا کہ محمد رضوان کو کپتانی کا تجربہ ہے ، وہ اچھی چوائس ہے وہ بس کھیل پر فوکس کرے ، ہمیں دشمنوں کی ضرورت نہیں ہم خود ہی بہت ہیں ، ہوم ایدوانٹیج پر تنقید سمجھ سے باہر ہے ، میں 5 ، 6 سال سے کہہ رہا ٹرننگ پچز بناو چاہے ہار جاو ، شکر ہے کسی کو تو خیال آیا ، خوشی ہے کہ 2026 ٹی ٹونٹی ورلڈ کپ کی تیاری کے لیے نوجوان کھلاڑیوں کو موقع دیا گیا ۔
سوینگ کے سلطان نے شاہین شاہ آفریدی اور نسیم شاہ کو مشورہ دیتے ہوئے کہا کہ ان دونوں سمیت دیگر کرکٹرز کھیل پر فوکس کریں اور سوشل میڈیا کو چھوڑ دیں ، کرکٹ کھیل کر گھر جائیں اور انجوائے کریں ۔
وسیم اکرم نے بابراعظم کو بھی کیریئر میں آگے بڑھنے کا مشور ہ دیا اور کہا کہ بابر اعظم کو کپتانی بھول جانی چاہیے ، کرکٹ کھیلیں رنز کریں ۔
