بنگلہ دیش کرکٹ ٹیم کے کھلاڑی مشفیق الرحیم کا کہنا ہے کہ پاکستان شاہینز بہت اچھا کھیلی اور خصوصاً عمر امین کی بیٹنگ بہت اچھی رہی ۔
اسلام آباد میں میڈیا سے گفتگو کرتے ہوئے مہمان کھلاڑی مشفیق الرحیم کا کہنا تھا کہ اسلام آباد بہت خوبصورت شہر ہے ، میں یہاں پہلی بار آیا ہوں ، یہاں اچھی سہولیات ہیں۔
مشفیق الرحیم کا کہنا تھا کہ پاکستان شاہینز کی جانب سے نسیم شاہ اور محمد علی نے بھی اچھی کارکردگی کا مظاہرہ کیا۔
مہمان کھلاڑی کا کہنا تھا کہ ہماری ٹیم میں نوجوان کھلاڑی شامل ہیں جنہیں یہاں سیکھنے کا موقع ملے گا اور کھلاڑیوں کو بہت فائدہ ہوگا۔
انہوں نے کہا کہ ہم بارش کے باعث پہلے دو روز پریکٹس نہیں کرسکے تاہم ، نیٹ سیشن ہوا تھا۔
ان کا مزید کہنا تھا کہ میں انگلی کی تکلیف کے سبب دوسری اننگ میں بیٹنگ نہیں کر سکا لیکن پہلا ٹیسٹ کھیلوں گا۔
