پاکستان کرکٹ بورڈ (پی سی بی) نے انٹرنیشنل کرکٹ کونسل (آئی سی سی) کو بھارت کے خلاف میچ کے بائیکاٹ کی وجوہات بتادیں۔
آئی سی سی اور پی سی بی میں مذاکرات کا آغاز ہوگیا ۔ بھارتی میڈیا کے مطابق پاکستان کرکٹ بورڈ نے انٹرنیشنل کرکٹ کونسل کو بھارت کے خلاف میچ کے بائیکاٹ سے متعلق آگاہ کردیا ۔
پاکستان کی طرف سے بتایا گیا کہ حکومتی فیصلے کے تحت بھارت سے میچ کا بائیکاٹ کیا گیا۔ آئی سی سی نے بھی پی سی بی سے اس حوالے سے تفصیلات طلب کی ہیں۔
یاد رہے کہ اتوار کے روز پاکستان نے یہ واضح کیا تھا کہ وہ ٹی 20 ورلڈ کپ میں شرکت تو کرے گا تاہم 15 فروری کو بھارت کے خلاف شیڈول میچ نہیں کھیلے گا۔
اسی حوالے سے وزیرِ اعظم شہباز شریف اور چیئرمین پی سی بی محسن نقوی کے درمیان ملاقات ہوئی تھی، جس میں ورلڈکپ میں شرکت سے متعلق ایک اہم فیصلہ کیا گیا۔
ملاقات کے بعد حکومتِ پاکستان کی جانب سے باضابطہ اعلان کیا گیا تھا کہ پاکستان ٹی ٹوئنٹی ورلڈکپ میں حصہ لے گا لیکن بھارت کے خلاف میچ کا بائیکاٹ کرے گا۔
دوسری جانب وزیراعظم شہبازشریف کا کہنا ہے کہ فیصلہ سوچ سمجھ کر کیا، پاکستان بھارت کے خلاف ٹی 20 ورلڈ کپ میں گروپ میچ نہیں کھیلے گا۔ وزیراعظم شہبازشریف نے کہا کہ ٹی ٹوئنٹی ورلڈکپ کے حوالے سے بڑا واضح مؤقف ہے، پاکستان بھارت کے خلاف میچ نہیں کھیلے گا، یہ کھیل کا میدان ہے،سیاست نہیں، کھیل کےمیدان میں سیاست بالکل نہیں ہونی چاہیے، ہم نے بڑا سوچ سمجھ کر اسٹینڈ لیا ہے۔ ہمیں بنگلادیش کے ساتھ پوری طرح کھڑا ہونا چاہیے۔
