ضلعی انتظامیہ لاہور نے بسنت ایس او پیز جاری کر دیے،ضلعی افسران ، پولیس اورمتعلقہ محکموں کو حفاظتی گائیڈ لائنز پر عملدرآمد کا حکم دیدیا۔
ڈپٹی کمشنر لاہورنے 6 تا 8 فروری کو ہونے والے پتنگ بازی فیسٹیول کا ضابطہ اخلاق جاری کر دیا،ضلعی انتظامیہ، پولیس اورمتعلقہ محکموں کو حفاظتی گائیڈ لائنز پرعملدرآمد کا حکم دیدیا گیا۔ ضابطہ اخلاق کا اطلاق لاہور بھر کے تمام مقامات بشمول عمارتوں اور چھتوں پرہوگا،ضلعی افسران اور پولیس کو چھتوں اورمقامات کے معائنےکا اختیارتفویض کردیا۔
شہریوں کے تحفظ کیلئے پتنگ بازی فیسٹیول کیلئے بارہ نکاتی سخت ضابطہ اخلاق جاری کیا گیا جس کے مطابق خطرناک ڈوراورہوائی فائرنگ کے خلاف زیروٹالرنس پالیسی اپنائی جائے۔ شہریوں کی حفاظت کیلئے دھاتی، کیمیائی اورنائیلون ڈورکا استعمال سختی سے منع ہے۔
لاہورمیں موٹر سائیکلوں پر سیفٹی راڈزکی تنصیب کو لازمی یقینی بنایا جائے گا،ہوائی فائرنگ اورعوامی سکون میں خلل ڈالنے والے ساؤنڈ سسٹم پرپابندی ہوگی۔ ایئرپورٹ اور حساس تنصیبات کے قریب پتنگ بازی کی ہرگزاجازت نہیں ہوگی ،چھتوں کے مالکان حفاظتی انتظامات اورکسی بھی حادثے کے ذاتی ذمہ دار ہوں گے۔
پتنگ بازی کے لیے غیر محفوظ چھتوں کے استعمال پر سخت پابندی عائد ہے۔ڈپٹی کمشنر کیپٹن ر علی اعجاز کا کہنا ہے کہ خطرناک ڈورکی خرید و فروخت پرپابندی پرسختی سےعمل کرایا جائےگا، قانون شکن عناصر کے خلاف فوری ایف آئی آر اور سخت کارروائی ہوگی۔
