پنجاب اسمبلی کے حلقہ پی پی 289 سے مسلم لیگ (ن) کے امیدوار اسامہ عبدالکریم بلامقابلہ منتخب ہو گئے ہیں۔ الیکشن کمیشن آف پاکستان نے اسامہ عبدالکریم کی کامیابی کا باقاعدہ نوٹیفکیشن جاری کر دیا ہے۔
الیکشن کمیشن کے مطابق ضمنی انتخاب میں حصہ لینے کے لیے مجموعی طور پر 11 امیدواروں نے کاغذاتِ نامزدگی جمع کروائے تھے، تاہم اسامہ عبدالکریم کے مقابلے میں 9 امیدواروں نے اپنے کاغذاتِ نامزدگی واپس لے لیے، جبکہ دسویں امیدوار محمد عباد خان ضمنی انتخاب سے دستبردار ہو گئے تھے۔
واضح رہے کہ پی پی 289 پر ضمنی انتخاب 25 جنوری کو شیڈول تھا، تاہم تمام امیدواروں کے دستبردار ہونے کے بعد مسلم لیگ (ن) کے امیدوار بلامقابلہ منتخب قرار پائے۔
یہ نشست مسلم لیگ (ن) کے سردار محمود قادر لغاری کے مستعفی ہونے کے باعث خالی ہوئی تھی۔ سردار محمود قادر لغاری قومی اسمبلی کے حلقہ این اے 185 سے کامیاب ہونے کے بعد صوبائی اسمبلی کی نشست سے مستعفی ہو گئے تھے۔
