پی ایس ایل کی 2 نئی ٹیمیں 360 کروڑ روپے میں فروخت کر دی گئیں، 7 ویں ٹیم ’ ایف کے ایس ‘ گروپ نے سب سے زیادہ 175 کروڑ روپے کی بولی لگا کر حاصل کی اور اسے ’حیدرآباد‘ کا نام دیا جبکہ 8 ویں ٹیم او زی ڈویلپرز نے 185 کروڑ کی بولی لگا کر خرید لی اور ٹیم کیلئے ’سیالکوٹ‘ کے نام کا انتخاب کیا۔
اسلام آباد میں ہونے والی نیلامی کی تقریب میں 9 گروپس نے شرکت کی۔
حیدرآباد
پی ایس ایل کی ساتویں ٹیم کی بولی کا آغاز 110 کروڑ روپے سے ہوا، فاتح بولی دہندہ اور آئی ٹوسی میں دلچسپ مقابلہ دیکھنے میں آیا، دام لگتے رہے ، قدربڑھتی رہی ۔ آئی ٹو سی نے اپنی آخری بولی 174 کروڑ روپے دی جس کے جواب میں ایف کے ایس گروپ نے 175 کروڑ روپے لگائی اور ٹیم حاصل کر لی ۔ ایف کے ایس گروپ نے اپنی ٹیم کیلئے ’ حیدرآباد‘ کے نام کو چنا ہے۔
سیالکوٹ
پی ایس ایل کی 8ویں ٹیم کی نیلامی کیلئے آئی ٹو سی، اے ایم نیکسٹ اور او زی ڈویلپرز کے درمیان دلچسپ مقابلہ ہوا، آئی ٹو سی کی جانب سے آخری بولی 182 کروڑ روپے کی دی گئی جس کے جواب میں او زی ڈویلپرز نے سیدھی 185 کروڑ روپے کی بولی لگائی اور ٹیم کو خرید لیا، او زی ڈویلپرز کی جانب سے ٹیم کیلئے ’ سیالکوٹ‘ کے نام کا انتخاب کیا گیا۔
چیئرمین پی سی بی محسن نقوی
چیئرمین پی سی بی محسن نقوی نے پی ایس ایل کی دو نئی ٹیموں کی کامیاب نیلامی کے بعد تقریب سے خطاب کرتے ہوئے کہا کہ حیدرآباد اورسیالکوٹ کےلوگوں کو مبارک باد، پی ایس ایل کے لیے یہ تاریخی لمحہ ہے ، ہم سب مل کرکرکٹ اورملک کو بلندیوں تک لے کرجائیں گے،پاکستان کرکٹ کو مزید کامیاب بنانا چاہتے ہیں، نئی ٹیموں کی نیلامی پاکستان میں سرمایہ کاری پر اعتماد کی کڑی ہے ، ہمارے نئے مالکان کا اعتماد پی ایس ایل کی ترقی میں اہم ہوگا، یہ صرف پی سی بی نہیں پورے پاکستان کی کامیابی ہے، نئی ٹیموں کے مالکان کو مبارک باد پیش کرتاہوں۔
تقریب کا آغاز
رنگ برنگی تقریب کا جناح کنونشن سینٹراسلام آبادمیں اہتمام کیا گیا، چیئرمین پی سی بی محسن نقوی ، وفاقی وزیرعطاتارڑ، طلال چوہدری ، طارق فضل چوہدری شریک ہوئے ۔
پی ایس ایل آکشن کی تقریب کے آغاز پر ہانگ کانگ سپر سکسز اور پاکستان شاہینز کے کھلاڑیوں اور منیجمنٹ کو انعامات سے نوازا گیا۔
تقریب کے دوران پاکستان شاہینز کو رائزنگ اسٹار ایشیاء کپ کا ٹائٹل جیتنے پر خراجِ تحسین پیش کیا گیا۔ یاد رہے کہ پاکستان شاہینز نے شاندار کارکردگی کا مظاہرہ کرتے ہوئے رائزنگ اسٹار ایشیاء کپ اپنے نام کیا تھا۔
اسی طرح ہانگ کانگ سپر سکسز ٹورنامنٹ میں بھی پاکستان کا اسکواڈ کامیاب رہا، جس پر کھلاڑیوں اور آفیشلز کو سراہا گیا۔
تقریب میں پاکستان شاہینز کو رائزنگ اسٹار ایشیاء کپ جیتنے پر 9 کروڑ روپے کی انعامی رقم دی گئی، جبکہ ٹیم کی کارکردگی کو پاکستان کرکٹ کے روشن مستقبل کی علامت قرار دیا گیا۔ہانگ کانگ سکسز کی فاتح ٹیم کو ایک کروڑ 85لاکھ روپے کی ا نعامی دی گئی۔
