اسلام آباد اور راولپنڈی کے درمیان ٹریفک کا مسئلہ حل کرنے کے لیے ٹی چوک پر تعمیر ہونے والا اقبال فلائی اوور 77 دن کی ریکارڈ مدت اور ایک ارب 40 کروڑ روپے کی لاگت میں مکمل کر لیا گیا۔
اقبال فلائی اوور ٹی چوک راولپنڈی اور اسلام آباد کے درمیان مرکزی جنکشن ہے۔ اسی مقام سے جی ٹی روڈ این فائیو،آزاد جموں و کشمیر اور راولپنڈی سے آنے والی تمام ٹریفک اسلام آباد میں داخل ہوتی ہے۔
ماضی میں یہ چوراہا بغیر سگنلز کے تھا، جس کے باعث یہاں شدید ٹریفک جام، طویل قطاریں اور شہریوں کو سخت مشکلات کا سامنا رہتا تھا، یہ فلائی اوور راولپنڈی اور راوت سے لاہور جانے اور آنے والی ٹریفک کو بلا رکاوٹ اسلام آباد منتقل کرنے میں مدد دے رہا ہے۔
منصوبے کی تکمیل کے بعد روزانہ تقریباً ایک لاکھ مسافروں کو سہولت فراہم کی جا رہی ہے،جبکہ سفر کا دورانیہ کم اور ٹریفک سیفٹی بہتر ہو گئی ہے۔ماحولیاتی بہتری کے لیے منصوبے کے تحت ہارٹیکلچر کا کام بھی مکمل کیا گیا ہےاور علاقے میں تین ہزار نئے درخت لگائے گئے ہیں۔
منصوبے کی مجموعی لمبائی 1034 میٹر ہے، جبکہ اپروچ روڈز کی لمبائی 300 میٹرہے،یوں کل لمبائی 1334 میٹر بنتی ہے۔مرکزی فلائی اوور اسٹرکچر 493 میٹر طویل ہے، اور اس کی کیریج وے چوڑائی 11.10 میٹر رکھی گئی ہے، تاکہ ٹریفک کی روانی محفوظ اور مؤثر رہے۔
فلائی اوور میں17 اسپینز، 68 گرڈرز اور 76 پائلز استعمال کیے گئے ہیں۔
