انڈونیشیا کے صدر پر ابو وسوبیانتو کا دو روزہ دورہ پاکستان کا اعلامیہ جاری کر دیا گیاہے جس دوران وزیراعظم شہباز شریف سے انڈونیشیا کے صدر کے وفود کی سطح پرمذاکرات ہوئے جبکہ انڈونیشیا کے صدر کی صدرآصف علی زرداری اور فیلڈ مارشل عاصم منیر سے بھی ملاقاتیں ہوئیں ۔
اعلامیہ کے مطابق ملاقاتوں میں دوطرفہ تعاون مزید مضبوط بنانے کے مشترکہ عزم کا اعادہ کیا گیا، انڈونیشیا کے صدر کو صدر مملکت نے پاکستان کے اعلیٰ ترین سول اعزاز نشان پاکستان سے نوازا، ملاقاتوں میں باہمی دلچسپی کے تمام شعبوں میں تعاون کو وسعت دینے کے عزم کا اظہار کیا گیا۔
مشترکہ مذاکراتی کمیٹی کا جلد از جلد اجلاس منعقد کرنے ، زرعی اور صنعتی سامان،پام آئل، آلات جراحی شعبوں میں تعاون بڑھانے پر اتفاق کیا گیا، حلال فوڈ انڈسٹری اور اسلامک فنانس میں تعاون کی اہمیت پر بھی زور دیا گیا، دفاعی تعاون اور فوجی تربیتی اداروں کے درمیان تبادلوں میں مزید اضافے پر اتفاق کیا گیا۔
انڈونیشین فریق نے دونوں ممالک کے درمیان جاری دفاعی تعلیم اور تربیتی تعاون کو سراہا، دفاعی صنعت میں تعاون کے ساتھ بحری اور ہوابازی سے متعلق تربیت پر بھی اتفاق کیا گیا، پاکستان نے قومی صحت کے شعبے میں بہتری کیلئے انڈونیشیا کی کوششوں کو سراہا، دواسازی ہیلتھ ایمرجنسی سمیت وبائی امراض کیلئے ویکسین کی تیاری کیلئےتعاون بڑھانے پر اتفاق کیا گیا۔
