ایف آئی اے نے مسافروں کو آف لوڈ کرنے کے حوالے سے سوشل میڈیا پر جاری پروپیگنڈا کو بے بنیاد قرار دے دیا۔ ترجمان کے مطابق ایسے من گھڑت اور گمراہ کن مواد کی تشہیر کرنے والے 15 سوشل میڈیا اکاؤنٹس کی نشاندہی کر لی گئی ہے۔
ترجمان ایف آئی اے کا کہنا ہے کہ ادارے کے خلاف غلط معلومات پھیلانے والوں کے خلاف کارروائی کے لیے این سی سی آئی اے کو خط لکھ دیا گیا ہے۔ سوشل میڈیا پر چند عناصر ادارے کی ساکھ کو نقصان پہنچانے اور عوام میں بے جا تشویش پیدا کرنے کے لیے جھوٹی پوسٹس شیئر کر رہے ہیں۔
ترجمان کے مطابق ایف آئی اے مکمل اور درست سفری دستاویزات رکھنے والے کسی بھی مسافر کو آف لوڈ نہیں کرتا۔ مسافروں کو نامکمل، جعلی دستاویزات یا مشکوک معلومات فراہم کرنے پر آف لوڈ کیا جاتا ہے۔
انہوں نے مزید کہا کہ انسانی اسمگلنگ یا غیر قانونی ہجرت میں ملوث ایجنٹس کے زیرِاثر افراد اور ماضی میں غیر قانونی سرگرمیوں یا سفری ریکارڈ کے حامل افراد کو بھی روکا جاتا ہے۔
