کابینہ کی اقتصادی رابطہ کمیٹی کے اجلاس میں وفاقی سول آرمڈ فورسز کے دفاعی آلات کی مرمت اور سول آرمڈ فورسز کو مزید رقم دینے کے علاوہ دفاعی خدمات کے منصوبوں کے لیےسپلیمنٹری گرانٹ منظور کرلی۔
وزیرِخزانہ محمد اورنگزیب کی زیرِ صدارت کابینہ کی اقتصادی رابطہ کمیٹی کا اجلاس ہوا۔اجلاس میں وفاقی سول آرمڈ فورسز کے دفاعی آلات کی مرمت کے لیے 10 کروڑ 3 لاکھ روپے کی منظوری دی گئی، جو ٹیکنیکل سپلیمنٹری گرانٹ کے طور پر فراہم کیے جائیں گے۔
سول آرمڈ فورسزکو داخلی سلامتی،بارڈرکنٹرول اور امن و امان کے مقاصد کے لیے مزید 84 کروڑ پندرہ لاکھ ساٹھ ہزار روپےدینےکی بھی منظوری دی گئی،اعلامیے کےمطابق دفاعی خدمات کے منصوبوں کے لیے 50 ارب روپےکی تکنیکی سپلیمنٹری گرانٹ منظور کی گئی۔
ای سی سی نےپاسکو کےخاتمے اوراس مقصد کے لیےخصوصی ادارہ قائم کرنے کی منظوری بھی دے دی، جبکہ ایس پی وی کا ابتدائی ادا شدہ سرمایہ 10 لاکھ روپے مقرر کیا گیا۔
پیٹرولیم ڈویژن کی سمری پر آف شور آئل اینڈ گیس بلاکس کے لیے لائسنس مدت میں توسیع اور ورکنگ انٹرسٹ کی منظوری بھی دے دی گئی۔غیر ملکی کمپنیوں کی سرمایہ کاری بڑھانے کے لیے نئی مراعاتی تجاویز بھی منظور کر لی گئیں۔
وزارت خزانہ کےمطابق فنڈز ٹیکنیکل سپلیمنٹری گرانٹ کےطور پر منظور کیے گئے،یہ رقم داخلی سلامتی، بارڈر کنٹرول اور امن و امان کیلئے فراہم کی جائے گی۔
