ویڈیو شیئرنگ پلیٹ فارم ٹک ٹاک نے صارفین کے لیے میسجنگ فیچرز میں اہم اپ ڈیٹس متعارف کرانے کا اعلان کیا ہے جس کے بعد یہ ایپ واٹس ایپ اور انسٹاگرام جیسی مقبول ایپس کو سخت مقابلہ دینے کے لیے تیار ہے۔
ٹک ٹاک کی جانب سے گزشتہ کچھ عرصے سے ڈائریکٹ میسجز (ڈی ایمز) پر خصوصی توجہ دی جا رہی ہے تاکہ صارفین محض فیڈ اسکرول کرنے کے بجائے ایپ میں زیادہ وقت بات چیت اور شیئرنگ میں گزاریں، اسی مقصد کے تحت اب کئی نئے فیچرز متعارف کرائے جا رہے ہیں۔
نئے فیچرز کے تحت صارفین اب 60 سیکنڈ تک کے آڈیو نوٹس بھیج سکیں گے۔
یہ سہولت بالکل واٹس ایپ کی طرح ہوگی جہاں چیٹ ونڈو میں موجود مائیکرو فون آئیکون پر کلک کرکے آڈیو ریکارڈ اور بھیجا جا سکے گا۔
اس کے علاوہ صارفین کو ایک وقت میں 9 تصاویر یا ویڈیوز بھیجنے کی سہولت بھی دی جا رہی ہے جنہیں وہ یا تو براہِ راست کیمرے سے ریکارڈ کرسکیں گے یا فون گیلری سے منتخب کر کے شیئر کریں گے۔
ان میڈیا فائلز کے لیے ایڈیٹنگ آپشنز بھی دستیاب ہوں گے۔
ٹک ٹاک نے کم عمر صارفین کے تحفظ کے لیے پابندیاں بھی برقرار رکھی ہیں۔
16 سال سے کم عمر افراد ڈائریکٹ میسجز استعمال نہیں کرسکیں گے جبکہ 16 سے 18 سال کے صارفین کو نامناسب مواد سے خودکار طور پر تحفظ فراہم کیا جائے گا۔
18 سال سے زائد عمر کے افراد چیٹ فلٹر کو اپنی مرضی کے مطابق آن یا آف کرسکیں گے۔
کمپنی کے مطابق یہ نئے فیچرز آئندہ چند ہفتوں میں دنیا بھر کے صارفین کے لیے دستیاب ہوں گے۔
