ملک بھر کے تعلیمی اداروں میں طلبا کو منشیات فروخت کرنے والوں کے خلاف مہم جاری ہے اور نو ماہ کے دوران 263 اداروں میں کارروائی کے دوران 1457 کلو منشیات پکڑی گئی، یہ انکشاف وفاقی وزیر داخلہ محسن نقوی کی جانب سے سینیٹ میں پیش کی گئی تفصیلات میں سامنے آیا۔
وفاقی وزیرداخلہ محسن نقوی کی جانب سے پیش کی گئی تفصیلات کے مطابق تعلیمی اداروں میں انسداد منشیات مہم ستمبر 2024 میں شروع ہوئی۔ مہم کے دوران تعلیمی اداروں سے 145 کلو گرام کلو حشیش، 14 کلو گرام افیون جبکہ پانچ کلوہیروئن اور کوکین برآمد کی گئی۔ برآمد کی گئی منشیات طلبا کو سپلائی کی جانی تھیں۔ تعلیمی اداروں میں منشیات سپلائی کرنے والے 451 ملزم بھی گرفتار کئے گئے۔ اے این ایف نے ملزمان کے خلاف تین سو پچانوے مقدمات درج کئے۔ سینیٹ کو دی گئی معلومات کے مطابق منشیات فروشی میں ملوث دس طلبا بھی گرفتار ہوئے جب کے خلاف مقدمات درج ہیں۔ اے این ایف کے یونیورسٹیوں میں منشیات فروشی کے خلاف اقدامات جاری ہیں۔ محسن نقوی نے بتایا کہ اے این ایف اسکول کالجز کے داخلی نظام میں براہ راست مداخلت نہیں کرتی، تعلیمی اداروں کے اردگرد منشیات فروشوں اور ان کے سہولت کاروں کے خلاف کارروائی ہوتی ہے۔
