پاکستان میں جدید بینکاری کے نئے دور کا آغاز ہوگیا، اسٹیٹ بینک نے ادائیگیوں کے نیا نظام ’’پرزم پلس‘‘ متعارف کرادیا۔ گورنر اسٹیٹ بینک جمیل احمد کہتے ہیں کہ پاکستان میں ریئل ٹائم انٹربینک پیمنٹ سیٹلمنٹ سسٹم کے نئے ورژن ’’پرزم پلس‘‘ کے آغاز سے ملک میں ڈیجیٹل ٹرانسفارمیشن کا نیا باب کھل گیا۔
گورنر اسٹیٹ بینک جمیل احمد نے کراچی میں تقریب کے وران ادائیگی کا نیا نظام ’’پرزم پلس‘‘ متعارف کرادیا۔ تقریب میں اسٹیٹ بینک کے اعلیٰ عہدیداران سمیت بینکنگ انڈسٹری کی چیدہ شخصیات عالمی مالیاتی اداروں کے نمائندوں نے شرکت کی۔
گورنر اسٹیٹ بینک جمیل احمد نے ریئل ٹائم سیٹلمنٹ کے ذریعے کی جانے والی ٹرانزیکشنز کی تفصیل بیان کرتے ہوئے کہا کہ پرانے نظام کے تحت گزشتہ برس ایک ہزار 43 کھرب روپے مالیت کی ٹرانزیکشنز پروسیس کی گئیں، جو ملکی جی ڈی پی سے 10 گنا زیادہ ہیں، ان میں سب سے زیادہ حصہ 730 کھرب روپے مالیت کی حکومتی سیکیورٹیز کے لین دین کا تھا، جبکہ حجم کے اعتبار سے 91 فیصد ٹرانزیکشنز تیسرے فریق کے کسٹمر ٹرانسفرز پر مشتمل تھیں۔
ان کا کہنا ہے کہ موبائل بینکنگ ایپس کے 2 کروڑ 80 لاکھ، برانچ لیس بینکنگ کے 7 کروڑ 10 لاکھ اور انٹرنیٹ بینکنگ کے ایک کروڑ 70 لاکھ صارفین اس ڈیجیٹل تبدیلی کا ثبوت ہیں۔
گورنر اسٹیٹ بینک نے مزید کہا کہ پرزم پلس جدید عالمی معیار آئی ایس او 20022 پر مبنی ہے جو مالیاتی لین دین میں شفافیت، سیکیورٹی اور باہمی ربط کو مزید مضبوط کریگا، اس نظام میں لیکویڈیٹی مینجمنٹ ٹولز، مستقبل کی ادائیگیوں کی شیڈولنگ اور مرکزی سیکیورٹیز ڈپازٹری کے ساتھ مربوط فیچرز شامل ہیں، جو نیلامیوں، کولیٹرل مینجمنٹ اور اوپن مارکیٹ آپریشنز کو مزید سہل بنائیں گے۔
جمیل احمد کا کہنا ہے کہ ورلڈ بینک کے تعاون سے متعارف کرایا گیا یہ نظام پاکستان کی مالیاتی صنعت اور کاروباری برادری کیلئے ایک انقلابی پیشرفت ہے۔
انہوں نے کہا کہ پاکستان کا پیمنٹ سسٹم عالمی سطح پر مسابقتی ہوچکا ہے، سیکیورٹی ہماری ریگولیشن کی ترجیحات میں شامل ہے، پرزم پلس نے محض 14 ماہ میں بہترین کارکردگی دکھائی ہے، ورلڈ بینک گروپ کی تکنیکی معاونت سے پرزم پلس کامیاب ہو پایا، کمرشل بینکوں نے بھی اس پراجیکٹ میں بھرپور معاونت کی۔
گورنر اسٹیٹ بینک کا کہنا ہے کہ پاکستان میں 22 کروڑ 50 لاکھ بینک اکاؤنٹ اور ڈیجیٹل والٹس ہولڈرز موجود ہیں، 9 کروڑ 60 لاکھ یونیک اکاؤنٹ ہولڈرز ہیں، پاکستان میں برانچ لیس بینکنگ استعمال کرنے والوں کی تعداد 7 کروڑ 10 لاکھ ہے۔
