یوم آزادی کے موقع پر وفاقی وزیر مواصلات اور صدر استحکام پاکستان پارٹی عبدالعلیم خان مستونگ، بلوچستان میں دہشت گردوں کے حملے میں شہید ہونے والے میجر زیاد سلیم کی رہائش گاہ پہنچے اور شہید کے اہل خانہ سے تعزیت کی۔
وفاقی وزیر عبدالعلیم خان نے میجر زیاد سلیم شہید کی والدہ سے ملاقات کے دوران کہا کہ آپ نے اپنا سہاگ اور لخت جگر ملک پر قربان کر دیا جو پوری قوم پر بہت بڑا احسان ہے۔
یوم آزادی کے موقع پر وفاقی وزیر مواصلات عبدالعلیم خان کی میجر زیاد سلیم شہید کی رہائشگاہ آمد،شہید کے لئے فاتحہ خوانی اور اہل خانہ سے اظہار تعزیت ۔ انہوں نے شہید کی والدہ محترمہ سے اظہار ہمدردی اور اُن کے جذبے، ہمت اور وطن سے محبت پر انہیں خراج تحسین پیش کیا۔ استحکام پاکستان پارٹی… pic.twitter.com/dulxKSwwFq
— Istehkam-E-Pakistan Party (@istehkamPK) August 14, 2025
عبدالعلیم خان نے کہا کہ شہید کی والدہ ہونا ایک بڑا اعزاز ہے اور اللہ تعالیٰ آپ کو صبر و حوصلہ عطا فرمائے۔
وفاقی وزیر نے شہید کے لیے فاتحہ خوانی کی اور کہا کہ یوم آزادی پر ہمیں وطن کی خاطر جانیں قربان کرنے والوں کو یاد رکھنا چاہیے۔
انہوں نے کہا کہ ہماری سلامتی کے لیے اپنے بچوں کو یتیم کرنے والے ہمارے قومی ہیرو ہیں اور وطن پر جان قربان کرنے والا ہر جوان ہمارے ماتھے کا جھومر ہے۔
صدر استحکام پاکستان پارٹی نے اس موقع پر کہا کہ آج کی آزادی دشمن کو سبق سکھانے والے شہداء کی قربانیوں کی مرہون منت ہے۔
میجر زیاد سلیم شہید کے تین بھائی آرمی افسران ہیں جبکہ والد بریگیڈیئر سلیم بھی وطن پر قربان ہو چکے ہیں۔
وفاقی وزیر کے ہمراہ استحکام پاکستان پارٹی کے ایم این اے اور پارلیمانی سیکرٹری گل اصغر بگھور بھی موجود تھے جبکہ شہید کے اہل خانہ نے عبدالعلیم خان کی آمد اور اظہار ہمدردی پر شکریہ ادا کیا۔
