فیڈرل انویسٹی گیشن ایجنسی (ایف آئی اے) کے نیشنل سینٹرل بیورو (این سی بی) انٹرپول اور امیگریشن ونگ نے کراچی ایئرپورٹ پر کامیاب کارروائی کرتے ہوئے پنجاب پولیس کے مطلوب اشتہاری ملزم کو گرفتار کر لیا۔
سخاوت نامی ملزم لائبیریا سے کراچی پہنچا تھا جبکہ ایف آئی اے این سی بی انٹرپول نے ملزم سخاوت کی گرفتاری کے لیے ریڈ نوٹس جاری کیا تھا اور اس کا نام اسٹاپ لسٹ میں بھی شامل تھا۔
ملزم سٹی تھانہ سرگودھا میں دھوکہ دہی کی دفعات کے تحت درج مقدمے میں گزشتہ 9 سال سے مطلوب تھا۔
گرفتاری کے بعد ایف آئی اے امیگریشن کراچی نے ملزم کو پنجاب پولیس حکام کے حوالے کر دیا تاکہ مزید قانونی کارروائی عمل میں لائی جا سکے۔
