صوبائی دارالحکومت میں چینی کی قیمتوں میں ایک بار پھر نمایاں اضافہ دیکھنے میں آیا ہے۔ چینی کی فی کلو قیمت میں 18 سے 20 روپے کا اضافہ ریکارڈ کیا گیا ہے، جس کے بعد شہر بھر میں چینی 195 سے 200 روپے فی کلو تک فروخت ہونے لگی ہے۔
مارکیٹ ذرائع کے مطابق 50 کلو چینی کی بوری کی قیمت 9100 روپے تک جا پہنچی ہے، جب کہ ہول سیل مارکیٹ میں فی کلو چینی 182 روپے میں دستیاب ہے۔ عام دکانوں اور ریٹیل مارکیٹس میں یہی چینی صارفین کو 195 سے 200 روپے فی کلو میں فروخت کی جا رہی ہے۔
دوسری جانب وفاقی کابینہ نے قیمتوں میں توازن برقرار رکھنے کے لیے 5 لاکھ ٹن چینی درآمد کرنے کی منظوری دے دی۔وزارت غذائی تحفظ نےحکومتی سطح پر چینی درآمد کرنے کے انتظامات مکمل کرلئے،وزارت غذائی تحفظ کا کہنا ہےکہ چینی کی درآمدحکومتی شعبے کےذریعےکی جائے گی،چینی کی قیمتوں میں توازن برقرار رکھنے کے لیے یہ اقدام اٹھایا گیا،چینی درآمد کا طریقہ ماضی کی حکومتوں سےمختلف اور واضح طور پر بہتر حکمت عملی کی نمائندگی کرتا ہے۔
مزیدکہا ماضی میں اکثرچینی کی مصنوعی قلت پیدا کر کےقومی خزانے پربوجھ ڈال کر سبسڈی پر انحصار کیا جاتا تھا،موجودہ حکومت نےچینی برآمدکرنےکا فیصلہ اُس وقت کیا تھاجب چینی وافرمقدار میں دستیاب تھی،اب چینی کی قیمتوں میں استحکام کے لیے چینی درآمد کی جا رہی ہے۔
