وفاقی دارالحکومت اسلام آباد سمیت ملک کے مختلف علاقوں میں طوفانی ہواؤں، جھکڑ اور بارشوں کا سلسلہ جاری ہے جس سے موسم خوشگوار ہو گیا لیکن کئی مقامات پر نقصانات بھی رپورٹ ہوئے ہیں۔
ضلعی انتظامیہ کی ٹیمیں ممکنہ طوفانی بارشوں کے پیش نظر فیلڈ میں موجود ہیں جبکہ ڈپٹی کمشنر اسلام آباد نے شہر میں تمام بڑے بل بورڈز ہٹانے کی ہدایت کی ہے اور تمام اسسٹنٹ کمشنرز کو نشیبی علاقوں پر خصوصی نظر رکھنے کے احکامات جاری کیے گئے ہیں۔
ٹیکسلا اور واہ کینٹ
ٹیکسلا اور واہ کینٹ میں تیز آندھی کے بعد بارش شروع ہوئی جس سے موسم خوشگوار ہو گیا تاہم، بارش کے آغاز کے ساتھ ہی بجلی کی فراہمی منقطع ہو گئی جس سے شہریوں کو مشکلات کا سامنا ہے۔
عیسیٰ خیل
عیسیٰ خیل اور گردونواح میں تیز آندھی کے ساتھ ہلکی بارش ریکارڈ کی گئی جس سے گرمی کا زور ٹوٹ گیا اور موسم خوشگوار ہو گیا۔
حسن ابدال
حسن ابدال اور ملحقہ علاقوں میں تیز آندھی نے صرافہ بازار میں ایک دکان کی چھت کی دیوار کا کچھ حصہ گرا دیا جس سے معمولی نقصان رپورٹ ہوا۔
فتح جنگ
فتح جنگ اور اس کے گردونواح میں گرج چمک کے ساتھ بارش ہوئی، شدید طوفان کے باعث شہر میں اندھیرا چھا گیا اور بجلی کی فراہمی معطل ہو گئی۔
مری
مری میں شدید گرج چمک کے ساتھ موسلادھار بارش کا سلسلہ شروع ہوا جس سے بجلی کا نظام بھی معطل ہو گیا۔
محکمہ موسمیات کے مطابق آج سے یکم جون تک مری میں طوفانی ہواؤں کے ساتھ موسلادھار بارشوں کا امکان ہے۔
ایبٹ آباد اور گلیات
ایبٹ آباد اور گلیات کے سیاحتی مقامات پر تیز ہواؤں اور گرج چمک کے ساتھ بارش ہوئی۔
ضلعی انتظامیہ نے سیاحوں کو ہدایت کی ہے کہ وہ لینڈ سلائیڈنگ والی جگہوں پر گاڑیاں پارک نہ کریں تاکہ کسی ناخوشگوار واقعے سے بچا جا سکے۔
لوئر اور اپر کوہستان
بالائی علاقوں بشمول لوئر اور اپر کوہستان میں بارش کا سلسلہ جاری ہے، بارش کے دوران سیلابی ریلے نے جیجال بازار کا رخ کیا جس سے قراقرم ہائی وے مختلف مقامات پر بند ہو گئی۔
وادی نیلم
ضلعی ہیڈکوارٹر اٹھمقام، زیریں نیلم، اور سیاحتی مقامات لوات، دواریاں، دودنیال، شاردہ، اڑنگ کیل، وادی شونٹھر اور وادی گریس میں تیز بارش ریکارڈ کی گئی جس سے گرمی کا زور ٹوٹ گیا اور موسم خوشگوار ہو گیا۔
