صدر مملکت آصف علی زرداری نے سی ایم ایچ راولپنڈی کا دورہ کیا جس دوران بھارتی حملوں میں زخمی ہونے والے فوجی جوانوں اور شہریوں کی عیادت کی ، اس موقع پر وفاقی وزیر داخلہ محسن نقوی اور کمانڈر 10 کور بھی ہمراہ تھے ۔
تفصیلات کے مطابق آصف علی زرداری نے کہا کہ ہمیں اپنے بہادر جوانوں کی قربانیوں پر فخر ہے، پوری قوم، اپنےسپاہیوں اور شہریوں کی قربانیوں کو سلام پیش کرتی ہے، پاکستانی قوم نے دشمن کی جارحیت کا ڈٹ کر مقابلہ کیا، بھارت کا رویہ جارحانہ، شدت پسندانہ اور علاقائی امن کیلئے خطرہ ہے، ہندوتوا نظریے سے پورے خطے کی سلامتی کو شدید خطرات ہیں۔
صدر زرداری نے کہا کہ مودی سرکار پاکستان کیخلاف جارحیت کو سیاسی مقاصد کیلئے استعمال کرنا چاہتی ہے ، پاکستان کی خودمختاری اور قومی سلامتی پر کوئی آنچ نہیں آنے دیں گے، پوری قوم کسی بھی جارحیت سے نمٹنے کیلئے متحد، پُرعزم اور ہوشیار ہے، پاکستان ہر قسم کی جارحیت کا منہ توڑ جواب دینے کی مکمل صلاحیت رکھتا ہے۔ صدر مملکت نے زخمیوں کی دیکھ بھال پر اسپتال کے ڈاکٹروں اور دیگرعملے کاشکریہ ادا کیا۔
