پاکستان کرکٹ بورڈ (پی سی بی) نے پی ایس ایل 10 کے ری شیڈول میچز کے لیے ٹکٹوں کی تفصیلات جاری کر دی ہیں۔
پی سی بی کے مطابق 8، 9 اور 10 مئی کے ٹکٹس خریدنے والے شائقین اب بالترتیب 17، 18 اور 19 مئی کو ہونے والے میچز دیکھ سکیں گے۔ پرانے شیڈول کے پلے آف راؤنڈ کے ٹکٹس نئی تاریخوں میں بھی قابلِ استعمال ہوں گی اور شائقین کو دوبارہ ٹکٹ خریدنے کی ضرورت نہیں ہوگی۔
راولپنڈی کرکٹ سٹیڈیم میں 18 مئی کو ڈبل ہیڈر ڈے ہونے کی وجہ سے دونوں میچوں میں شرکت کے لیے 9 مئی کا ٹکٹ استعمال کیا جا سکتا ہے۔ جن شائقین نے ایلیمینیٹر 1، 2 اور فائنل کے ٹکٹ خریدے ہیں وہ متعلقہ میچوں کی نئی اعلان کردہ تاریخوں کے مطابق انہیں استعمال کر سکتے ہیں۔
باقی لیگ میچز اور پلے آف کے ٹکٹ pcb.tcs.com.pk اور نامزد ٹی سی ایس ایکسپریس مراکز سے بھی خریدے جا سکتے ہیں۔
شائقین 5 اور 10 مئی کو ملتان میں ہونے والے مقابلوں اور راولپنڈی میں پہلے کے شیڈولڈ کوالیفائر کا مکمل ریفنڈ حاصل کر سکتے ہیں۔ آن لائن اور کارپوریٹ ریفنڈ بکنگ کے وقت استعمال کیے گئے اکاؤنٹس میں منتقل کیے جائیں گے۔
فزیکل ٹکٹوں کو ٹی سی ایس کے نامزد ایکسپریس مراکز پر ذاتی طور پر واپس کرنے کی ضرورت ہوگی۔ رقم کی واپسی کی تاریخ کا اعلان مناسب وقت پر کیا جائے گا۔
