طالبان حکومت نے افغانستان کا بگرام ایئر بیس امریکا کو دینے سے متعلق خبروں پر باضابطہ بیان جاری کردیا۔ ذبیح اللہ مجاہد نے غیر ملکی میڈیا کی خبروں کو بے بنیاد قرار دیدیا۔
عالمی خبر رساں ادارے کے مطابق ترجمان طالبان ذبیح اللّٰہ مجاہد نے بگرام ایئرپورٹ کی امریکا حوالگی سے متعلق خبروں کو پروپیگنڈا قرار دیتے ہوئے کہا ہے کہ ایئر بیس پر مکمل طور پر ہمارا کنٹرول ہے۔
ذبیح اللہ مجاہد کا کہنا ہے کہ یہ کسی طرح بھی ممکن نہیں ہوسکتا کہ بگرام ایئربیس کو امریکا کے زیر انتظام دیدیا جائے۔
ترجمان طالبان نے مزید کہا کہ ہمارے ملک کو کسی غیر ملکی فوجی کی ضرورت نہیں ہے اور نہ ہی امارتِ اسلامیہ اس کی اجازت دے گی۔
غیر ملکی میڈیا نے ایک رپورٹ میں دعویٰ کیا تھا کہ افغان طالبان نے بگرام ایئر بیس کا کنٹرول امریکا کے حوالے کردیا ہے۔
سب سے پہلے یہ خبر بلغارین ملٹری ڈاٹ کام نے افغان خبر رساں ادارے کے حوالے سے نشر کی تھی۔
جس میں دعویٰ کیا گیا تھا کہ طالبان کی رضامندی سے امریکا نے بگرام ایئر بیس کا کنٹرول سنبھال لیا اور امریکی فوجی طیارہ، بشمول ایک سی 17 طیارے کے جنگی ساز و سامان کے ساتھ وہاں پہنچ چکا ہے۔
