انٹربینک مارکیٹ میں پیر کو امریکی ڈالر کے مقابلے میں پاکستانی روپے کی قدر میں 0.01 فیصد اضافہ دیکھا گیا۔
کاروبار کے اختتام پر ڈالر کے مقابلے میں روپیہ 4 پیسے سستا ہوکر 280.17 روپے پر بند ہوا۔
گزشتہ ہفتے انٹر بینک مارکیٹ میں ڈالر کے مقابلے میں روپیہ 24 پیسے یا 0.09 فیصد کی کمی سے 280.21 پر بند ہوا تھا۔
بین الاقوامی سطح پر امریکی ڈالر پیر کو اپنی اہم کرنسیوں کے مقابلے میں پانچ ماہ کی کم ترین سطح کے قریب رہا جس پر صدر ڈونلڈ ٹرمپ کی غیر متوقع تجارتی پالیسیوں اور کمزور معاشی اعداد و شمار کے دباؤ کا اثر تھا۔
یورو 5 ماہ کی بلند ترین سطح کے قریب رہا، جب جرمن جماعتوں نے جمعہ کے روز ایک مالی معاہدے پر اتفاق کیا، جو دفاعی اخراجات میں اضافے اور یورپ کی سب سے بڑی معیشت میں ترقی کی بحالی میں مدد دے سکتا ہے۔
دوسری جانب بینک آف جاپان کی جانب سے سخت اشارے ملنے کے بعد جاپانی ین 5 ماہ کی بلند ترین سطح پر پہنچ گیا تاہم توقع کی جارہی ہے کہ مرکزی بینک بدھ کو پالیسی فیصلے میں جوں کا توں برقرار رکھے گا۔
چینی یوآن آف شور ٹریڈنگ میں 4 ار ماہ کی بلند ترین سطح کے قریب واپس آیا، امریکی ڈالر انڈیکس جو اسے یورو، ین اور دیگر چار کرنسیوں کے مقابلے میں جانچتا ہے 103.71 پر تقریباً مستحکم رہا، جو گزشتہ منگل کی 5 ماہ کی کم ترین سطح 103.21 سے محض 0.5 فیصد زیادہ تھا۔
