پاک فوج کے شعبہ تعلقات عامہ کے ڈائریکٹر جنرل ( ڈی جی آئی ایس پی آر ) نے آئی بی اے یونیورسٹی کراچی کا دورہ کیا اور طلباء سے ملاقات کی جسے طلباء نے کافی سراہا اور خصوصی نشست کے اہتمام پر شکریہ بھی ادا کیا۔
آئی بی اے آمد پر ڈی جی آئی ایس پی آر کا طلباء کی جانب سے بھرپور استقبال کیا گیا جبکہ ڈائریکٹر جنرل نے پاکستان کی ترقی اور خوش حالی میں طلبہ کے مثبت کردار کو سراہا۔
ڈی جی آئی ایس پی آر نے یونیورسٹی کو لرننگ کا سمبل قرار دیا اور کہا کہ میں اس کامیابی پر یہاں کے اساتذہ کو سلیوٹ پیش کرتا ہوں، یہ اپنی طرز کا نہ صرف بہترین ادارہ ہے بلکہ یہاں کا نظام تعلیم بھی دنیا کے جدید تقاضوں کے عین مطابق ہے۔
انہوں نے طلباء و طالبات کے سوالات کے جواب انتہائی خوش اسلوبی سے دیئے اور ان کی تعمیری سوچ کو سراہا۔
اس موقع پر طلبہ نے پاک افواج کی قربانیوں اور خدمات کو خراج تحسین پیش کیا اور اساتذہ اور طلبہ نے اظہار خیال کرتے ہوئے کہا کہ اُن کے سوالات کے تفصیلی جوابات دیئے گئے جو انتہائی تسلی بخش تھے۔
طلبہ کا کہنا تھا کہ ہم سوشل میڈیا پر پاک فوج کے خلاف کیے جانے والے پروپیگنڈا کی مکمل نفی کرتے ہیں۔
طلبہ اور اساتذہ نے اس دلچسپ سیشن کو سراہا اور ڈی جی آئی ایس پی آر سے کہا کہ اس طرح کےمزید سیشن منعقد کیے جائیں۔
طلباء سے ملاقات کے سلسلے میں ہی کل ڈی جی آئی ایس پی آر لاہور میں نیشنل کالج آف آرٹس ( این سی اے ) اور لاہور یونیورسٹی آف مینجمنٹ سائینسز ( لمز ) کے طلباء و طالبات سے بھی ملاقات کریں گے۔
